Memlekettik rámizderge arnalǵan jıyn ótti

«Uly Dala Eli – Táýelsizdiktiń 25 negizi» atty juldyzdy 25 kún aıasynda Memlekettik hatshy Gúlshara Ábdiqalyqovanyń tóraıymdylyǵymen Memlekettik rámizder jáne vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń keńeıtilgen otyrysy ótti. Otyrysqa ortalyq jáne jergilikti atqarýshy organdardyń basshylary, qoǵam qaıratkerleri, mádenıet jáne sport salalarynyń ókilderi, ǵalymdar qatysty. Jıynda sóz alǵan Gúlshara Ábdiqalyqova Qazaqstan Táýelsizdiginiń 25 jyldyǵyn merekeleý boıynsha Tujyrymdama jasalǵanyn, oǵan sáıkes, Táýelsizdiktiń shırek ǵasyrǵa tolǵan torqaly toıyn atap ótý jónindegi is-sharalar josparlary qabyldanǵanyn atap ótti. «21 qarasha men 15 jeltoqsan aralyǵynda ótetin is-sharalar «Táýelsizdiktiń 25 juldyzdy kúni» aıasynda ótedi. Osyǵan oraı, kúni keshe elimizdiń 16 jasqa tolǵan azamattaryna jeke kýálikterin saltanatty túrde tabystaý rásimi ótkizilse, búgingi jıyn Táýelsizdiktiń basty nyshany – Memlekettik rámizderge arnalyp otyr», – dedi Gúlshara Naýshaqyzy. Sonymen qatar, ol el Táýelsizdiginiń 25 jyldyǵyn merekeleý aıasynda bıylǵy jyldyń sáýir aıynda ótken Qazaqstan halqy Assambleıasy keńesiniń «Táýelsizdik. Kelisim. Bolashaǵy birtutas ult» atty 24-inshi sessııasynda «Máńgilik El» patrıottyq aktisiniń qabyldanǵanyna toqtala kele, bul tarıhı qujatta Máńgilik eldiń myzǵymas 7 tuǵyryn nyǵaıtý, saqtaý, urpaqtan urpaqqa amanat etý mindetteri belgilengenin jetkizdi. «Olar Táýelsizdik jáne Astanaǵa, jalpyulttyq birlikke, beıbitshilik pen kelisimge, zaıyrly memleket jáne joǵary rýhanııatqa, ınnovasııa ıirimderine, turaqty ekonomıkalyq ósimge, jalpyǵa ortaq eńbek qoǵamyna, tarıhtyń, mádenıet pen tildiń ortaqtyǵyna, ulttyq qaýipsizdik pen Qazaqstannyń jalpy álemdik jáne óńirlik problemalaryn sheshýge tikeleı baılanysty», - dedi Memlekettik hatshy. Jıyn aıasynda Gúlshara Ábdiqalyqova elimizdiń barlyq óńirinde memlekettik rámizderge arnalǵan baıqaýlardyń, patrıottyq is-sharalardyń júrgizilip jatqanyn aıta kele: «Memlekettik rámizder – el ishindegi turaqtylyqtyń, qoǵamdyq kelisim men patrıottyq tárbıeniń asa mańyzdy quraly», – dedi. Otyrysta Eltańba avtory Jandarbek Málibekov Týdyń, Eltańbanyń, Ánurannyń Qazaqstannyń, onyń Táýelsizdiginde alatyn ornyna toqtalsa, qoǵam qaıratkeri Myrzataı Joldasbekov alǵash Táýelsizdik alǵan jyldardaǵy estelikterimen bólisti. «Ońaı bolǵan joq. Muny urpaq bilýi kerek. Qýanǵan da, qoryqqan da birdeı degen. Sol kezde jurttyń esi shyǵyp ketti. Sonyń bárin ustap, durys qalypqa salý, árıne, ońaıǵa túsken joq. Bul jerde Elbasynyń tózimi de jetti, aqyly men parasaty da jetti. Sonyń arqasynda babalarymyz, qolyna qarý alǵan batyrlarymyz, kósemderimiz, danalarymyz, aqyndarymyz, jyraýlarymyz, handarymyz jete almaǵan, osynyń jolynda basynda  basyn báıgege tikken, biraq, jany qıylǵan, ómiri ótken Táýelsizdikke biz, qazaq halqy jettik», – dedi Myrzataı Joldasbekov. Onyń aıtýynsha, ol jyldary qazaq halqynyń sany 39 paıyz bolǵan eken. «Sol kezde bizdi burynnan beri Qazaqstanda ómir súrip jatqan ózge ult ókilderi de qoldady. Biz muny eshqashan umytpaýymyz kerek. Qazaqstannyń jelbiregen kók Týynyń tuǵyry halqymyzdyń myzǵymas birligi men yntymaǵynyń arqasynda bıiktep tur», – dedi Myrzataı Joldasbekov. Láıla EDILQYZY, «Egemen Qazaqstan».