Aqmola oblysynda qansha múlik zańdastyryldy?

Aqmola oblysynda jalpy aýqymy 12 mıllıard teńgeniń múlki zańdastyryldy. Bul týraly óńirlik kommýnıkasııalar qyzmetinde ótken brıfıng barysynda «Qazaqstan Respýblıkasynyń Ulttyq banki» Aqmola oblystyq fılıalynyń dırektory Bekturǵan Bozterıev málim etti, dep habarlaıdy «QazAqparat». Oblystaǵy múlikti zańdastyrý jumystarynyń barysy týraly ótken brıfıngke «Qazaqstan Respýblıkasynyń Ulttyq banki» Aqmola fılıalynyń dırektory Bekturǵan Bozterıev, oblystyq memlekettik kirister departamentiniń basqarma basshysy Nazgúl Aıýpova men tergeýshi-mamany Áset Tánıev jáne múlikti jarııa etý jónindegi komıssııanyń hatshysy Ásel Aqysheva qatysty. Ulttyq bank fılıaly dırektorynyń aıtýynsha, oblys aýmaǵynda múlikti zańdastyrý jumystary oıdaǵydaı júrgizilýde. «Búgingi kúnge deıin oblysymyzda múlik pen aqshany zańdastyrýǵa baılanysty 2579 ótinish tústi. Jyljymaıtyn múlikke qatysty 4812 nysandy zańdastyrý týraly ótinish qabyldansa, olardyń 1733-i turǵyn úıge baılanysty. Qujattary durys bolmaǵan jáne zań talaptaryna saı emestikten, komıssııa 448 ótinishti qaraýdan bas tartty. Ákimdik jelisi boıynsha osy kúnge deıin jalpy aýqymy 12 mıllıard teńgeniń múlki zańdastyryldy. Oǵan qosa, 495,9 mıllıon teńge aqsha zańdastyrylǵan», dep atap ótti oblystyń bas bankıri. Sonymen qatar, brıfıng barysynda Memlekettik kirister departamenti basqarmasynyń basshysy Nazgúl Aıýpovanyń múlik pen aqshany zańdastyrýdyń sharttary týraly baıandamasy da tyńdaldy.