Stanımır STOILOV: Biz úshin mańyzdy emes match bolǵan joq

Senbi kúni Qazaqstan Kýbogyn jeńip alǵannan keıin «Astana» fýtbol komandasynyń bas jattyqtyrýshysy Stanımır Stoılov maýsymnyń qorytyndysy týraly óz oılaryn ortaǵa saldy. – Bıyl «Astana» tarıhta tuńǵysh ret «altyn dýbl» jasady, ıaǵnı chempıondyqty da, Kýbokty da jeńip aldy... – Shynynda da, bul maýsymda bizdiń fýtbolshylarymyz orasan zor jumystar atqardy. «Astana» qatarynan úshinshi márte chempıon atanýmen birge, Almatyda Kýbok úshin «Qaıratpen» ótken fınalda jeńiske jetti. Buǵan deıin komanda almatylyqtardy jarystyń bul satysynda utyp kórmegen edi. Buǵan qosa, Eýropa lıgasynyń toptyq kezeńine shyqtyq. Osylaı­sha úsh maıdanda shaıqasqan ujym jyldyń sońyna qaraı sońǵy trofeıdi de jeńip alyp, maýsymdy joǵary jetistikpen tııanaq­tap otyr. Osy matchtyń aldyn­da men endi Kýbokty qosa jeńip almasaq, bıylǵy jetistigimizdiń jarym-jartylaı bolatynyn, qalaı­da maqsatqa jetýge umtyla­ty­ny­myzdy málimdep  edim. Sol mejeni alǵanymyzǵa óte qýanyshtymyn. – Degenmen, fınaldyq match aldynda jurttyń kóbi «Qaırattyń» jeńiske jaqyn turǵanyn aıtyp edi. – Al biz olaı dep eseptegen joqpyz. Osy matchta qaıtkende de jeńiske jetýdi kózdedik. Soǵan oraı kúshimizdi de durys eseptedik. Jalpy, men jumys jasasyp kele jatqan 2,5 jyldyń ishinde «Astana» asa mańyzdy matchtarda aldyna qoıylǵan júkti kóterip kete alatyn komanda ekenin udaıy kórsetýmen keledi. Biz kez kelgen matchta favorıt bolyp júrmiz. Munyń ústine, bizdiń jasaq úshin maýsym ishinde mańyzdy emes match bolǵan emes. Endi naqtyly myna oıynǵa kelsek, eki jaqtyń jeńiske degen umtylystary men múmkindikteri shamalas kórindi. Atalmysh eki komanda kezdeskende, túbinde kimniń utatynyn aldyn ala aıtý qashanda qıyn. Bul oıynda da solaı boldy. Jaǵ­daıdy tek aýa raıy biraz óz­ger­tip jiberdi. Qar basqan alańda oınaý eki jaqqa da ońaıǵa túsken joq. Biraq sol qıyn sátterde bizdiń oıynshylar birinshi bolyp shalttyq tanytty. – Dop ekinshi taımnyń bas ja­ǵynda soǵylǵasyn, siz sol esep­ti ustap turýdyń ornyna shabýyldy kúsheıtýge kúsh sal­dy­ńyz ǵoı. Bul nelikten jasal­dy? – Alańnyń sıpaty mynadaı bol­ǵa­syn, tablodaǵy eseptiń kez kelgen ýaqytta ózgerip ketýi múm­kin edi. Sondyqtan qolda bar shabýyl­shylardyń bárin iske qosý­ǵa táýekel ettik. Maqsatymyz qalaı­da taǵy bir gol salý boldy. Sol kezde ǵana bizdiń jeńiske de­gen senimimiz óse túsetinin paıym­dadyq. Al alań qardan jaqsylap tazartylǵannan keıin qorǵanysta oınaýymyz jeńildeı tústi. – «Astana» maýsym tolyq aıaqtalmaı jatyp, óz quramyna jańa oıynshylar ala bastaǵan ba? – Bizde qorǵanysta oınaıtyn qazaqstandyqtar jeterlik. Biraq shabýyl ótinde oınaıtyndar arasynda jergilikti fýtbolshylardyń úles-salmaǵy onshalyqty kóp emes. Sol olqylyqtyń ornyn toltyrý maqsatynda Pavlodardan Roman Mýrtazaevty shaqyryp otyrmyz. Ol bıylǵy chempıonatta Jerar Goýdan keıingi ekinshi mergen shabýylshy atandy. Biz sondyqtan «Ertistiń» forvardyn óz qatarymyzdan kórgimiz keldi. – Al búgingi matchta qaqpashy Nenad Erıchtiń kórinbeýine ne sebep? – Onyń oıynyna qatysty eshqandaı sebep joq. Tek bizde bıyl­ǵy Kýbok oıyndarynda Alek­sandr Mokınniń alańǵa shyǵýy ózindik bir dástúr sııaqty bolyp qalyp edi, sony buzǵymyz kelmedi. – «Astana» úshin bul jylǵy maýsym áli jabylǵan joq qoı. – Durys aıtasyz. Búginnen bastap Qazaqstandaǵy barlyq komandalar qysqy úziliske shyqty. Al bizge Chempıondar lıgasynyń toptyq raýndynda áli eki match ótkizý kerek. Aldymen, 24 qarasha kúni óz alańymyzda Kıprdiń APOEL-in qabyldasaq, 8 jeltoqsanda Shveısarııada jergilikti «Iаng Boız» klýbymen kúsh synasyp, toptyq oıyndardy aıaqtaımyz. Áńgimelesken Talǵat SÚIINBAI, «Egemen Qazaqstan»   ALMATY