Qazaqstandy rámizderine qarap tanıdy

«Uly Dala eli – Táýelsizdiktiń 25 negizi» atty juldyzdy 25 kún sharasy aıasynda Memlekettik hatshy Gúlshara Ábdiqalyqovanyń tóraǵalyǵymen Memlekettik rámizder, vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń keńeıtilgen otyrysy ótti.  Otyrysqa ortalyq jáne jergilikti atqarýshy organdardyń basshylary,  qoǵam qaıratkerleri, mádenıet jáne sport salalarynyń ókilderi, ǵalymdar qatysty. Jıynda sóz alǵan Gúlshara Ábdi­qalyqova Qazaqstan Táýelsizdiginiń 25 jyldyǵyn merekeleý boıynsha Tujyrymdama jasalǵanyn, soǵan sáıkes, Táýelsizdiktiń shırek ǵasyrǵa tolǵan torqaly toıyn atap ótý jó­nin­degi is-sharalar josparlary qa­byldanǵanyn atap ótti. «21 qara­sha men 15 jeltoqsan aralyǵynda óte­tin is-sharalar «Táýelsizdiktiń 25 juldyzdy kúni» aıasynda uıym­das­tyrylady. Osyǵan oraı, kúni keshe eli­mizdiń 16 jasqa tolǵan azamattary­na jeke kýálikterin saltanatty túrde tabystaý rásimi ótkizilse, búgingi jıyn Táýelsizdiktiń basty nyshany – Memlekettik rámizderge arnalyp otyr», – dedi Gúlshara Naýshaqyzy.  Sonymen qatar, ol el Táýelsizdiginiń 25 jyldyǵyn merekeleý aıasynda bıylǵy jyldyń sáýir aıynda ótken Qazaqstan halqy Assambleıasy Keńesiniń «Táýelsizdik. Kelisim. Bolashaǵy birtutas ult» atty XXIV sessııasynda «Máńgilik El» Patrıottyq aktisiniń qabyldanǵanyna toqtala kele, bul tarıhı qujatta Máńgilik Eldiń myzǵymas 7 tuǵyryn nyǵaıtý, saqtaý, urpaqtan-urpaqqa amanat etý mindetteri belgilengenin jetkizdi.  «Olar Táýelsizdik pen Astanaǵa, jalpyulttyq birlikke, beıbitshilik pen kelisimge, zaıyrly memleket jáne joǵary rýhanııatqa, ınnovasııa ıirimderine, turaqty ekonomıkalyq ósimge, Jalpyǵa Ortaq Eńbek Qoǵamyna, tarıhtyń, mádenıet pen tildiń ortaqtyǵyna,  ulttyq qaýipsizdikke, sondaı-aq, Qazaqstannyń jalpy álemdik jáne óńirlik problemalaryn sheshýge tikeleı qatysýyna baılanysty», – dedi Memlekettik hatshy. Jıyn aıasynda Gúlshara Ábdiqalyqova elimizdiń barlyq óńirinde memlekettik rámizderge arnalǵan baıqaýlardyń, patrıot­tyq is-sharalardyń júrgizilip jatqanyn aıta kele: «Mem­le­kettik rámizder – el ishindegi turaq­tylyqtyń,  qoǵamdyq keli­sim men patrıottyq tárbıeniń asa ma­ńyzdy quraly.  Sondyqtan olardy qadirlep, qaster tutýymyz kerek», – dedi. Otyrysta Eltańba avtory Jan­darbek Málibekov te sóz aldy. Ol Týdyń, Eltańbanyń, Ánurannyń Táýelsiz Qazaqstannyń ómirinde alatyn ornyna toqtala otyryp, 1992 jylǵy maýsymnyń 4-inde Joǵarǵy Keńestiń saltanatty májilisinde Qazaqstannyń jańa memlekettik rámizderimen resmı tanysý bolǵanyn, al 1996 jyldyń 24 qańtarynda  Prezıdenttiń «Qazaq­stan Respýblıkasynyń Mem­lekettik rámizder týraly» kons­tıtýsııalyq kúshi bar Jarly­ǵymen Eltańbanyń quqyqtyq már­tebesi aıqyn­dalǵanyn jetkizdi. Al qoǵam qaıratkeri Myrzataı Joldasbekov eldiń alǵash óz táýel­sizdigin alǵan kezeńin eske alyp, tol­ǵanysymen  bólisti. Táýelsiz­diktiń joly «Ońaı bolǵan joq. Muny urpaq bilýi kerek. Qul­dyraǵan ekonomıkany, turala­ǵan óndiristi qalypqa salý árıne, ońaıǵa túsken joq. Bul jerde Elbasynyń tózimi de jetti, aqyly men parasaty da jetti. Bul jolda basyn báıgege tikken, biraq, jandary qıylǵan babalarymyz, qolyna qarý alǵan batyrlarymyz, kósemderimiz, danalarymyz, aqyndarymyz, jyraý­larymyz, handarymyz jete al­maǵan Táýelsizdikke biz jet­tik», – dedi Myrzataı Joldas­bekov. Onyń aıtýynsha, sol jyldary qazaq halqynyń sany 39 paıyz bolǵan eken. «Sol kezde bizdi bu­rynnan beri Qazaqstanda ómir súrip jatqan ózge ult ókilde­ri de qoldady.  Biz muny eshqa­shan umytpaýymyz kerek. Qazaq­stannyń jelbiregen kók Týynyń tuǵy­ry halqymyzdyń myzǵymas birli­gi men yntymaǵynyń arqa­synda bıiktep tur. Esiktegi basymyz tórge jetti. Qa­zaq­stan damy­dy, ony álem tany­dy, moı­ynda­dy. Qazaqtyń tili BUU min­berinen estildi.  «Ba­qyt baǵa­laǵannyń ǵana basynda turady» deıdi, biz osy baqytty baǵa­laı bilýimiz kerek dep oılaı­myn», – dedi Myrzataı Joldas­bekov. Sonymen qatar, ol Memle­kettik rá­mizderdiń qundyly­ǵyna qatys­ty da óz oıyn bil­dirdi. «Mem­lekettik rámizder – memlekettiń pasporty, ıaǵnı tólqujaty. Bizdiń jel­biregen Týymyzǵa, Eltańba­myzǵa, Ánuranymyzǵa qarap, Qazaq­standy tanıdy», dedi Myrzataı Joldasbekov. Bul kúngi otyrysta sondaı-aq, Syrtqy ister, Aqparat jáne kom­­mýnıkasııa, Mádenıet jáne sport mınıstrlikteriniń, Alma­ty qalasynyń, Qaraǵandy, Shy­ǵys Qazaqstan oblystary ákim­deriniń esepteri tyńdaldy. Jıyn sońynda memlekettik organdar men ákimdikterge naqty tapsyrmalar júkteldi. Láıla EDILQYZY, «Egemen Qazaqstan» Sýretti túsirgen Erlan OMAROV