Elimizde onlaın ýnıversıtet iske qosylady

«Ksell» kompanııasy men «WikiBilim» qoǵamdyq qory «Qazaqstannyń ashyq   ýnıversıteti» bilim berý onlaın jobasyn iske qosý jumysyn bastaıdy. Almatyda ótken elimizdegi onlaın bilim berýdi damytý baǵyttaryna arnalǵan dóńgelek ústelde osyndaı málimdeme jasaldy, dep habarlady jasqazaq.kz. «WikiBilim» qoǵamdyq qory prezıdenti Nurbek Mátjanıdiń aıtýynsha, búginde ınternet qoldanýshylary 5000-nan astam túrli onlaın kýrsty paıdalana alady. Oqytý materıaldary bar eń tanymal alańdar - Coursera, EdX, Udacity. Biraq bulardyń kóp bóligi aǵylshyn tilinde. «Tehnologııalar arqasynda bilim berý isi ózge de kóptegen qyzmet túri sııaqty derbestendirilip keledi. Búginde kýrs oqýshylar qashan, qaı kezde oqý kerektigin jáne ótken materıaldaryn neshe ret qaıtalaý kerek ekenin ózi tańdaıdy. Munyń bári dıplom úshin emes, bilim alý úshin oqıtyndarǵa, ómir boıy bir ret qana bilim alýdy kózdeıtinderge emes, únemi jetilip, damýǵa tyrysatyndarǵa qolaıly», deıdi «WikiBilim» qoǵamdyq qory qamqorshylyq keńesiniń tóraǵasy Raýan Kenjehanuly. «Qazaqstannyń ashyq ýnıversıteti» - elimizdiń jetekshi joǵarǵy oqý oryndary oqytýshylarynyń vıdeo dáristerin tegin tyńdaýǵa múmkindik beretin onlaın alań. Birinshi kezeńde telekommýnıkasııalar boıynshat 10 kýrsty iske qosý josparlanyp otyr. Sol sııaqty portalda osy kýrsty daıyndaý barysynda qoldanylǵan oqýlyqtar ashyq ornalasady.  Sonymen qatar dáris materıaldarynyń 80% -dan astamy qazaq tilinde usynylady. Aldaǵy ýaqytta mamandandyrylǵan kýrstardyń sany artyp otyrady. Jobany jasaýshylar qoldanýshylarǵa osyndaı alańdarǵa arnalǵan eń ozyq qyzmetter jıyntyǵyn usynady. Bul joba álemniń jetekshi ýnıversıtetteri - Garvard ýnıversıteti men Massachýsets tehnologııa ınstıtýtynyń tandemimen jasalǵan Open EdX platformasy negizinde iske asyrylady. Jıyn barysynda sóz alǵan fızıka-matematıka ǵylymdarynyń doktory,  akademık Asqar Jumadildaev, bul bastamany kóterip otyrǵan jastarǵa rızashylyǵyn bildirdi. Ol qazirgi qoǵamnyń ornyn osy ashyq ýnıversıtet basatynyn aıtty. Búkil dúnıe júzi qoldana bastaǵan ashyq ýnıversıtettiń bizdiń elde de  mańyzy erekshe ekenine toqtaldy. Ár jyl saıyn bilim deńgeıi ózgerip otyratyndyqtan, zaman talabyna saı bolýymyzdy da atap ótti.  Dóńgelek ústel barysynda jańa jobanyń múmkindikteri men onyń júzege asyrylýy talqylandy.