25 jylda 2 mln. jumys orny ashyldy

Qazaqstanda Táýelsizdik jyldary aralyǵynda 2 mln-ǵa jýyq jańa jumys orny quryldy. Kásipkerlikti damytýǵa tıisti jaǵdaı jasaldy. Nátıjesinde táýelsizdik jyldary memleket bıýdjeti 1 100 esege ósti. Jalpy ishki ónimniń úlesi 1,5 ese ulǵaıdy. Barlyq qolǵa alynǵan sharalar halyqtyń ál-aýqatyn jaqsartýǵa baǵyttaldy. Bul týraly QR Parlamenti palatalarynyń birlesken otyrysynda Májilis depýtaty Nurtaı Sabılıanov málimdedi, dep habarlaıdy Baq.kz. «Ultymyz úshin táýelsizdik – asyl qazynamyz. Tutas bir halyqtyń taǵdyry synalǵan sheshýshi sátte QR Tuńǵysh prezıdenti Nursultan Nazarbaev el tizginin qolyna aldy. Ol táýelsizdiktiń týyn tigip, tar jolda kidirmeı, taıǵaqta súrinbeı, jol bastady. El múddesin murat etken Elbasymyzdyń eńbeginiń arqasynda jarqyraı kelgen jas memleket alǵa qadam basty», - dedi ol. Sonymen qatar, Nurtaı Sabılıanov táýelsizdik jyldary júrgizilgen qarjy reformalaryna toqtaldy. «Naqty júıege bet buryp, jekeshelendirý júrgizildi. Investısııa tartylyp, shetelmen ózara saýda qatynasy jolǵa qoıyldy. Tól teńgemiz qoldanysqa engizilip, derbes qarjy júıesi quryldy. Jumys isteýge qolaıly jaǵdaı jasalyp, jeke kásipkerlik qarqyndy damydy. Bul táýelsiz elimiz úshin buryn-sońdy bolmaǵan óz nátıjesin berdi. Oǵan dálel Táýelsizdik jyldary memleket bıýdjeti 1 100 esege ósti. Jalpy ishki ónimniń úlesi 1,5 esege ulǵaıdy», - dedi depýtat. Sondaı-aq, halyq qalaýlysy bul ózgeristerdiń ulttyq ekonomıkaǵa oń áser etkendigin atap ótti. «Memleket basshysynyń Ulttyq qordy qurýy el ekonomıkasynyń eńsesin tiktep, halyqtyń ál-aýqatyn jaqsartýǵa baǵyttaldy. Jalaqy jyl saıyn eselenip, 2 mln-ǵa jýyq jumys orny ashyldy. Infraqurylym qaıta qalpyna keltirilip, damyp, el ıgiligine jaratyldy», - dedi ol. Sóz sońynda Nurtaı Sabılıanov elimizdiń damyǵan memleketterdiń qataryna qosylý úshin mańyzdy jobalardy qolǵa alǵandyǵyn aıtty. Aıta keteıik, búgin QR Parlamenti palatalarynyń birlesken otyrysynda Táýelsizdik deklarasııasy qabyldandy.