Respýblıkalyq bıýdjet týraly zań jobasy maquldandy

Búgin QR Parlamenti Májisiliniń jalpy otyrysynda «2017-2019 jyldarǵa arnalǵan jalpy sıpattaǵy transfertterdiń kólemi týraly» zań jobasy talqylandy, dep habarlaıdy Baq.kz. Depýtattarǵa zań jobasyn Qarjy jáne bıýdjet komıtetiniń múshesi Omarhan О́ksikbaev tanystyrdy. Sondaı-aq, mańyzdy otyrysta «Respýblıkalyq jáne oblystyq bıýdjetter, respýblıkalyq mańyzy bar qala, astana bıýdjetteri arasyndaǵy 2017-2019 jyldarǵa arnalǵan jalpy sıpattaǵy transfertterdiń kólemi týraly» zań jobasy da talqyǵa tústi. «17 qarashada «Respýblıkalyq jáne oblystyq bıýdjetter, respýblıkalyq mańyzy bar qala, astana bıýdjetteri arasyndaǵy 2017-2019 jyldarǵa arnalǵan jalpy sıpattaǵy transfertterdiń kólemi týraly» zań jobasy QR Parlamentiniń Senatynda qaralǵan bolatyn. Alaıda, ózgerister men tolyqtyrýlarǵa baılanysty, respýblıkalyq bıýdjettiń 2017-2018 jyldarǵa arnalǵan jobasyna 4 túzetý engizdi. Onyń ishinde 3 túzetý Almaty qalasynyń bıýdjettik alý kólemin jyl saıyn 1,8 mlrd teńgege azaıtýǵa baılanysty. Atalǵan qarajat Ýnıversıada-2017 ótkizý úshin salynǵan «Almaty-Arena» jáne «Halyq Arena» kópfýnksıonaldy eki muz keshenin kútip-ustaýǵa arnalǵan. Osy obektilerdi kútip-ustaýdy Almaty qalasy bıýdjetiniń esebinen júrgizý josparlanyp otyr», - dedi ol. Sondaı-aq, Omarhan О́ksikbaev Senat engizgen ózgerister atalǵan zań jobasyna keri áser etpeıtindigin atap ótti. «Senat engizgen 1 túzetý Halyqty nátıjeli jumyspen qamtýdy jáne jappaı kásipkerlikti damytýdyń jańa baǵdarlamasyn ázirleýge baılanysty 7-qosymshanyń taqyrybyn ózgertýge baılanysty bolǵan. Alaıda Senat engizgen túzetýler jalpy zań jobasynyń negizgi konsepsııasyna keri áser etpeıdi. Osy oraıda Qarjy jáne bıýdjet komıteti QR Parlamentiniń Májilisinen Senat engizgen ózgeristerdi qabyldaýdy suraıdy», - dedi ol. Osydan keıin QR Parlamenti Májisiliniń jalpy otyrysynda depýtattar zań jobasyna daýys berip, mańyzdy qujat maquldandy.