Jer kodeksiniń keı normalaryna moratorıı uzartylady

Májilis depýtattary Jer kodeksiniń jekelegen normalarynyń qoldanysyn 2021 jyldyń 31 jeltoqsanyna deıin toqtata turýdy kózdeıtin zań jobasyn maquldady, dep habarlady QazAqparat. Atalǵan zań jobasyn QR Parlamenti Májilisiniń jalpy otyrysynda QR Premer-Mınıstriniń orynbasary – Aýyl sharýashylyǵy mınıstri Asqar Myrzahmetov tanystyrdy. «Sizderdiń talqylaýlaryńyzǵa usynylyp otyrǵan zań jobasy Memleket basshysynyń ústimizdegi jyldyń 18 tamyzynda qabyldaǵan Jarlyǵyna sáıkes engizilip otyr. Jer reformasyna baılanysty qabyldanǵan keıbir sheshimderdiń qoǵamdyq pikir týdyrýyna oraı oryn alǵan problemalardy talqylaı kele, moratorıı jarııalanǵan bolatyn. Oǵan oraı ústimizdegi jyly 30 maýsymda tıisti Zań qabyldady. Sol Zańda moratorııdiń merzimi aǵymdaǵy jyldyń 31 jeltoqsanyna deıin dep belgilengen edi», – dedi ol. Osy rette mınıstrdiń aıtýynsha, jer salasyndaǵy problemany jer komıssııasy qaraǵan kezde aýyl sharýashylyǵy salasyndaǵy jerlerdiń derekti qoryn jasaý, qoldanystaǵy kóptegen normalarǵa ózgertýler engizý, onyń ishinde aýyl sharýashylyǵy maqsatyndaǵy jerlerdiń kadastrlyq qunyn qaıta qaraý máseleleri kóterilgen. «Osyǵan sáıkes, jer komıssııasy Memleket basshysyna usynyspen shyqty. Ol usynys QR Prezıdenti tarabynan qoldaý taýyp, arnaıy Jarlyqpen 2016 jyldyń 31 jeltoqsanynan 2021 jylǵy 31 jeltoqsanǵa deıin uzartylyp otyr. Sizderge engizilgen zań jobasynda osy bir ǵana másele qaralady», – dedi Myrzahmetov.