Forýmǵa óńirdegi belsendi úkimettik emes uıymdardyń oblystyq departamentter men basqarma basshylary, qoǵamdyq keńes músheleri, máslıhat depýtattary, ardagerler, etnomádenı birlestikter men kásipodaq uıymdary, barlyq aýdandardyń ókilderi, kásipkerler qatysty. Alqaly jıyndy qysqasha kirispe sóz sóılep ashqan oblys ákimi Berdibek Saparbaev óńirdiń qoǵamdyq – saıası ómirindegi úkimettik emes uıymdardyń roline toqtaldy. Olardyń Táýelsizdiktiń 25 jyldyǵy aıasynda uıymdastyrylǵan 200 myńnan astam adamdy qamtyǵyn 4 myńǵa jýyq sharanyń óz dárejesinde ótýine ózindik úlesterin qosqanyn atap ótti.
Jıynda baıandama jasaǵan oblystyq ishki saıasat basqarmasynyń basshysy Erbol Nurǵalıevtiń aıtýynsha, úkimettik emes uıymdardyń jobalaryn memlekettik áleýmettik tapsyrys aıasynda qarjylandyrý kólemi jyldan-jylǵa artyp keledi. 2015 jyly oblys boıynsha memlekettik áleýmettik tapsyrys 123 432 myń teńge bolsa, bıyl qarjylandyrý kólemi 216 mıllıon teńgeni quraǵan. -Qazirgi tańda oblysta 600-ge jýyq kommersııalyq emes uıym tirkelgen, olar – qoǵamdyq birlestikter, qoǵamdyq qorlar, zańdy tulǵalar birlestigi. Solardyń 110-ǵa jýyǵy belsendi jumys isteıdi.Oblys turǵyndarynyń 46 paıyzy ÚEU-dyń qyzmetin paıdalanǵan. Bul óńirdegi azamattyq ınstıtýttar damýynyń kórsetkishi bolyp tabylady,-dedi ol.
Belgili qoǵam qaıratkeri, «Ult taǵdyry» qoǵamdyq birlestiginiń tóraǵasy Dos Kóshim sóz alyp, úkimettik emes uıymdardyń áleýmettik salaǵa kóbirek aralasatynyn, qoǵamdyq-saıası baǵytta belsendilik tanytpaıtynyn, sondaı-aq, qazaq tildi úkimettik emes uıymdardy oqytý jáne damytý kemshin túsip jatatynyn atap ótti. «Aqtóbe qalasynyń sal aýrýyna shaldyqqan azamattardy qoldaý ortalyǵy» qoǵamdyq birlestiginiń tóraıymy Q.Báımenova, «Er-Baqyt» patrıottyq –sporttyq klýby» qoǵamdyq birlestiginiń tóraǵasy Marat Qoılybaev jáne úkimettik emes uıymdar men bıznes ókilderi sóz sóılep, táýelsizdik jyldaryndaǵy ÚEU-dyń damý kezeńderine toqtaldy, ÚEU-dyń damýy men problemalary, memlekettik organdarmen jáne bıznes ókilderimen ózara qarym-qatynas máseleleri jaıli oılaryn ortaǵa saldy.
Forým aıasynda azamattyq qoǵam ınstıtýttary jetistikteriniń kórmesi men 2017 jylǵa arnalǵan jańa úzdik jobalardyń tusaýkeseri ótkizildi. О́ńirdegi azamattyq qoǵam ınstıtýttaryn damytýǵa jáne mańyzdy áleýmettik problemalardy sheshýge belsene atsalysqan 15 uıym jetekshisi gramotalarmen, alǵys hattarmen marapttalyp, baǵaly jáne aqshalaı syılyqtarǵa ıe boldy. Jıynda ústimizdegi jyldyń 25 qarashasynda Astanada ótetin VII Azamattyq forýmǵa qatysatyn delegattar saılandy. Satybaldy SÁÝIRBAI, «Egemen Qazaqstan» Sýretterdi túsirgen Haıreden Raýshanov. Aqtóbe.
