Qala máslıhatynyń kezekti sessııa otyrysynda Astana ákimdigi din isteri basqarmasynyń basshysy Danııar Esin osylaı dep málimdedi. Bul týraly BNews.kz habarlady. Basqarma basshysynyń aıtýynsha, mekeme mamandary jyl saıyn bas qaladaǵy dinı ahýalǵa taldaý júrgizedi. Osy maqsatta din ahýalyn zertteý ortalyǵy da jumys isteıdi. Astanada jat aǵym ıdeologııasyna ýlanǵan azamattarmen qatar osy bap boıynsha sottalǵan tulǵalarǵa da ońaltý ortalyǵynyń kómegi qajet. «Qazirgi ýaqytta dástúrli emes dinı aǵymdy nasıhattaǵany úshin sottalǵandar tizimi, sondaı-aq, olardyń bostandyqqa shyqqandary da bar. Biraq, bul sanattaǵy azamattardyń keıingi jaǵdaıyn baqylaıtyn, qadaǵalaýda ustaıtyn, psıhologııalyq jáne basqa da kómek kórsetetin júıe ázirge joq. Mundaı qoldaýdy olardyń otbasy, týǵan-týystary da qatty qajet etedi. Ońaltý ortalyqtary arqyly biz osyndaı azamattarǵa kómektesip qana qoımaı, odan keıingi jaǵdaılardy da qadaǵalaı alamyz», – deıdi Danııar Esin. Vedomstvo basshysy bul jumystarǵa jergilikti ımamdar da jumyldyrylatynyn jetkizdi. Imamdar biliktilikterin arttyrý úshin arnaıy kýrstardan ótkiziledi. Mamandardyń pikirinshe, bul ımamdarǵa teologııalyq pikirtalas órbitýge múmkindik beredi. Radıkaldy baǵytqa ergen azamattardyń sanasynda tolyq zerdelenbegen dinı málimetter saqtalady. Biliktilik arttyrý kýrstarynda din qyzmetkerleri jańylys basqan jandardyń dástúrli dinge bet burýyna dálel-dáıektermen yqpal jasaýdy jáne psıhologııalyq áser etýdi meńgeredi ári sheshendik sheberlikterin shyńdaıdy. Máslıhat depýtattary bul iste teologtar men din mamandaryn kóptep tartýdy usyndy. Din isteri basqarmasynyń basshysy D.Esin din mamandarynyń kómegi qashanda mańyzdy ekenin, alaıda, bilikti kadrlardyń az ekenin aıtty. Aıta keteıik, búgingi kúni din salasy óte mańyzdy mamandyq qataryna shyqqan. Osyǵan baılanysty ótken jyly joǵary oqý oryndarynda dintaný mamandyqtaryna bilim granttarynyń sany kóbeıtildi.
