Halyqaralyq olımpıada komıteti qazaqstandyq atletti 2012 jylǵy London jáne 2008 jylǵy Beıjiń Olımpıadasynyń júldelerinen aıyrǵany belgili. Mundaı sheshim Ilınniń dopıng-synamalarynan tyıym salynǵan zattardyń tabylýyna baılanysty boldy. «A» jáne «V» synamalaryn qaıta saraptaý qorytyndysy boıynsha HOK-tyń tártiptik komıssııasynyń sheshimimen sportshynyń jetistigi joqqa shyǵarylyp, ol júldeleri men dıplomdarynan aıyryldy. Munyń aldynda QR Aýyr atletıka federasııasynyń bastamasymen qazaqstandyq sportshylardyń synamalaryn qaıta tekserýdiń qorytyndysyn birneshe aı zerttegen qorǵaýshylar men zerthanalyq sarapatama salasynyń mamandarynan top qurylǵan bolatyn. «Degenmen tanymal mamandar dopıng-synamany qaıta tekserýden kemshilik tappady. Osynyń saldarynan qazaqstandyq atletterdiń olımpıadalyq jetistikterin qorǵap qalýǵa esh múmkindik bolmady. Al qorǵaýshylar toby sportshynyń álemdik jáne qurlyqtyq birinshilikterde utqan júldeleri men ataqtaryn qorǵaýdy jalǵastyrady. Sonymen birge, aýyr atletti jarysqa qatystyrmaý jazasyn jeńildetýge tyrysady. Halyqaralyq aýyr atletıka federasııasy jarysqa qatystyrmaý merzimi týraly sheshimdi jaqyn arada qabyldaıdy», – delingen federasııa habarlamasynda. Osy jyldyń maýsym aıynda 28 jastaǵy sportshy osy jaǵdaılarǵa baılanysty 2016 jylǵy Olımpıadaǵa qatysa almady.
