Muhtar Áýezovtiń dombyrasyn kórip edim

Kóp jyl­dardan beri oqyrmany bolyp qumartyp oqıtyn «Egemen Qazaq­stannyń» (11 qazan 2016 jyl) kezekti sa­nynda Qostanaı qala­syndaǵy ishki ister mınıstrliginiń general-leıtenanty, buryn ishki ister mınıstri qyzmetin abyroımen atqarǵan Shyraqbek Qabylbaev atyndaǵy akade­mııanyń mýzeıinde Muhtar Áýezovtiń kózin kórgen, sol kisiniń dombyra-sheberine arnaıy tapsyryspen jasatqan dombyrasy jaıly Názıra Já­­rim­betovanyń maqalasyn oqydym. Qaı jyly ekeni esimde joq, juba­ıy­myz ekeýmiz Almaty qalasyndaǵy Mu­qan Tólebaev kóshesinde turatyn Shyraq­bek Qabylbaevtyń páterinde qonaq bolý­dyń sáti tústi. Shákeńniń uly Marat meniń úlken bajam Qalı Qaıshybaevtyń kishi qyzy Raýshanǵa úılengen bolatyn. Ekeý­leriniń de ákeleri birin-biri jaqsy syı­laıtyn, qurmetteıtin eski dostar eken, keıin dostyqtary qudalyqqa jalǵasypty. Sol úıde otyrǵanymda kózime tór­de ilýli turǵan dombyra tústi. Dom­byranyń dúkenderde satylatyn kóp dom­­byralarǵa uqsas emes ekeni syrt beı­ne­sinen-aq baıqaldy. Túsi qońyr, saǵaǵy uzyn emes, arnaıy jasalǵan dombyra ekeni kórinip tur. Men qyzyǵyp ketip qolyma alyp tartyp kórip edim, buraýy buzylmaǵan dombyranyń ózi sóılep, ándetip turǵandaı áser etti. Jas kezimnen dombyraǵa áýestigim bolýshy edi, sol dombyrada birneshe kúıdi sherttim, halyq ánderin oryndadym. Bir keremeti, dombyrany tartqan saıyn tartqym kele beredi (sol jyldary eki quda da, qudaǵılar da, Marat ta dúnıeden ótken edi). Dombyraǵa qyzyqqanym sonsha, Raýshannan «Ákelerińniń kózderindeı kórip júreıin, osy dombyrany maǵan syılashy?» dep suradym. Ol: «Bere almaımyn, jaqynda atanyń atynda mýzeı ashylmaqshy, soǵan tapsyrmaqshymyz», dedi. Men: «Onda tipten jaqsy bolǵan eken», dep rızalyǵymdy bildirdim. Gazet­tegi maqalany oqyǵannan keıin ýádelerin oryndap, dombyra qundy jádiger retin­de túpkilikti ornyn tapqanyna, mýzeıge bar­ǵandardyń barlyǵy kórip, dombyranyń tarıhymen tanysyp, kóp maǵlumat alatyndaryna ishteı qýanyp qaldym. Eger mende bolǵanda onyń syryn kim biler edi? О́zim de dombyranyń tarıhyn gazet­ten oqyp bildim ǵoı, kezinde eshkim aıtqan joq edi, bilsem suramas edim ǵoı. Myrzabek ÁTENOV,  qart dáriger, zeınetker ShYMKENT