Múmkindigi shekteýlilerge múmkindik

Qostanaıda  muqtajdyǵy bar múgedek balalar úshin psıhologııalyq-pedagogıkalyq túzeý kabıneti ashyldy. Bul múgedek bala ósirip otyrǵan ata-analardyń zor qýanyshyna aınaldy. Qoǵam qaıyrymdylyqtan kende emes, túrli sharalar ótip, múmkindigi shekteýli jandarǵa, balalarǵa  kómek qolyn sozatyndar az emes. Alaıda múgedek  bala ósirip otyrǵan ata-ananyń óz problemasymen ózi betbe-bet qalatyn kezderi az bolmaıdy. Sebebi múgedek balany damytý keıde tek qarjyǵa emes, zamanaýı jabdyqtar men ádistemelerge,  mamandar kómegine zárý bolady. Al Qostanaı óńirinde osyndaı kómekke zárý on myńnan asa bala bar. Olar turyp jatqan jergilikti jerlerde, aýyldarda, tipti aýdan ortalyqtarynda olardy damytatyn ortalyqtar jetkiliksiz, tipti joqtyń qasy. Sondyqtan, «Dara» qorynyń  jobasy aıasynda Qostanaı oblysy ákimdiginiń qoldaýymen muqtajdyǵy bar múgedek balalar úshin psıhologııalyq-pedagogıkalyq túzeý kabınetin ashýy aldymen aýrý bala ósirip otyrǵan ata-analardyń qýanyshyna aınaldy. Arnaıy ortalyqta defektolog, psıholog, logoped, tıflopedagog, sýrdopedagog, massajıst sekildi mamandar jumys isteıdi. Ár kabı­net balany damytýdyń ádistemesine oraı zamanaýı jab­dyqtarmen jabdyqtalǵan. Onda Montessorı ból­me­si­, deneshynyqtyrý zalyna deıin bar. – Biz erekshe muqtajdyqtary bar balalar maman­dar qyz­metin tegin paıdalanýy úshin túzeý ortalyqtaryn asha­myz. Bul múmkindigi shekteýli balalardyń ósken­de  ómirden óz jolyn tabýyna irgetas qalaıdy. Maman­dar­dy oqytyp,  elimizde ınklıýzıvti  bilim berý isin engizýdi qoldap kelemiz, – dedi «Dara» qorynyń quryl­taı­shysy Gúlnar Dosaeva. Qazirge deıin psıhologııalyq-pedagogıkalyq túzeý ka­bınetine damýynda aýytqýlary bar  7 jasqa deıingi 125 bala jazyldy, mamandardyń aıtýynsha, aldaǵy ýaqytta múmkindigi shekteýli 150 balaǵa deıin qamtýǵa múmkindik bar. Názıra JÁRIMBETOVA, «Egemen Qazaqstan» QOSTANAI