Halyqaralyq fýtbol federasııasy (FIFA) 2016 jyldyń úzdik oıynshysy men jattyqtyrýshysyn anyqtaý maqsatynda júrgizilgen daýys berý nátıjelerin jarııalady. Buǵan ulttyq qurama kapıtandary men bas jattyqtyrýshylary qatysty.
Qazaqstan atynan bul iske Talǵat Baısýfınov pen Baýyrjan Islamhan atsalysty. Ulttyq qurama jattyqtyrýshysy bul ataqqa Lıonel Messıdi laıyq dep atasa, Portýgalııa kapıtanyn ekinshi, al «Iýventýs» qaqpashysy Djanlýıdjı Býffondy úshinshi oryndarǵa qoıdy.
Baýyrjan Islamhannyń úshtigi mynadaı: 1) Andres Inesta, 2) Messı, 3) Ronaldý.
Degenmen, «Real» fýtbol klýby men Portýgalııa ulttyq quramasynyń shabýylshysy Krıshtıaný Ronaldý 34.54% daýyspen úzdik oıynshy atandy. Bul kórsetkish boıynsha Messıde – 26.42%, Grızmanda – 7.53%.
Sonymen qatar, jyl jattyqtyrýshysyn anyqtaýda Baısýfınovtiń pikiri boıynsha birinshi – Hosep Gvardıola («Manchester Sıtı»), ekinshi – Fernandý Santýsh (Portýgalııa ulttyq quramasy), úshinshi – Dıego Sımeone («Atletıko»). Al Islamhan Hosep Gvardıolany, Zınedın Zıdandy («Real»), Dıego Sımeoneni myqty dep atady.
Aıta keteıik, bul ataqqa «Lester» fýtbol klýbymen aǵylshyn premer-lıgasynda top jarǵan Klaýdıo Ranerı ıe boldy.
