Tirkeý onlaın túrde qoljetimdi boldy

Azamattardy ýaqytsha tirkeý úderisteri kúnnen-kúnge qanatyn jaıyp, qarqynyn údetip keledi. Biraq tirkelýge tıisti barlyq azamatty az kúnde tirkep shyǵarý ońaı emes. Oǵan biraz ýaqyt kerek ekeni anyq. Soǵan baılanysty da elimizdiń HQO-larynda azamattardy turǵylyqty jeri boıynsha ýaqytsha tirkeýde túrli máseleler týyndap, qalyń kezek paıda boldy. Bul túrli keleńsizdikterge de soqtyrdy. Mine, qazir osy máseleniń de sheshimi tabylyp otyr. Endi qalyń kezek qaptaǵan HQO-larǵa barmaı-aq tirkelýdi júzege asyrýǵa bolady. Buǵan dálel búgingi kúni Qazaqstannyń elektrondyq úkimeti portalynda eGov.kz azamattardyń turǵylyqty jeri boıynsha ýaqytsha tirkelý qyzmeti qoljetimdi. Bul týraly atalǵan portal­da habarlanyp otyr. Munda bul qyzmet túrin paıdalaný úshin, aldymen turǵyn úı ıesi men onda tirkelý nıetin bildirgen azamattarda elektrondyq sıfrlyq qoltańba (ESQ) bolýy jáne olardyń portalda avtor­lan­dyrýdan ótýi qajettigi aıtylady. Al qyzmettiń ózi «Azamattyq, mıgrasııa jáne ımmıgrasııa» bóliminde, «Halyqty tirkeý jáne tirkeý esebinen alyp tastaý» qosymsha paraǵynda qoljetimdi eken. Budan soń «Onlaın qyzmetine tapsy­rys berý» túımeshegin basqannan keıin, ótinish berýshi usynylǵan nysan­dy toltyrady, onda tirkelýge nıetti tur­ǵyn úıdiń menshik ıesi bolyp taby­la­tynyn nemese tabylmaıtynyn kórsetýi tıis. Eger de ótinish berýshi jyljymaıtyn múlik ıesi bolsa, ol mekenjaıdy, tirkelý merzimin (1 aıdan 12 aıǵa deıin) kórsetýi tıis, sodan soń onlaın túrde kórsetilgen qyzmet úshin memlekettik bajdy tólep jáne ESQ ótinimge qol qoıýy kerek. Turǵyn úıdiń menshik ıesi úshinshi tarap bolǵan jaǵdaıda, ótinish berýshi menshik ıesiniń JSN-yn, jyljymaıtyn múliktiń mekenjaıyn, ýaqytsha tirkelýdiń merzimin kórsetýi jáne menshik ıesiniń jeke kabınetine kelip túsetin suraý salýdy jiberýi qajet. Eger de turǵyn úıdiń birneshe menshik ıesi bolsa, olardyń bireýiniń ǵana derekterin kórsetý jetkilikti, qalǵandary júıemen Qazaqstan Respýblıkasy «Jyljymaıtyn múlik tirkelimi» memlekettik derekter qory arqyly avtomatty túrde anyqtalatyn bolady. Menshik ıesi (bireý nemese birnesheý) óziniń kelisimin ESQ arqyly rastaıdy, odan soń ótinim tirkelýge nıetti azamattyń Jeke kabınetine oralyp keledi. Oǵan memlekettik baj tólemin onlaın túrde júrgizip jáne de óziniń suraý salýyna ESQ qol qoıýy qajet. Osydan keıin, ótinim Qazaqstan Respýblıkasy Ishki ister mınıstrliginiń júıesine túsedi, onyń óńdelýine 10 mınýttaı ǵana ýaqyt ketedi. О́ńdelip bolǵan soń, portalda «Ýaqytsha meken­jaıdyń tirkelýi sátti túrde ótti» degen mártebe kórsetiledi. Mekenjaı anyq­tamasyn ala otyryp, ýaqytsha tirkelý mekenjaıyn tekserýge bolady. eGov.kz nemese HQO arqyly ýaqyt­sha tirkelý jónindegi barlyq suraq­tar boıynsha azamattar tegin, táýlik boıy jumys isteıtin Biryńǵaı baılanys ortalyǵynyń 1414 nómirine qońyraý shala alady. Osylaısha barynsha sapaly jáne jyldam qyzmet kórsetýdi qamtamasyz etý maqsatynda Biryńǵaı baılanys ortalyǵynda aǵymdaǵy jyldyń basynan beri operatorlar sany kóbeıtilip, olardyń jumys kestesi qaıta qaralǵan. Aleksandr TASBOLATOV, «Egemen Qazaqstan»