Qazaqstandyqtar Ulybrıtanııada 52 mlrd teńgeniń múlkin zańdastyrdy

Qazaqstandyqtar 2 jylda 32 elden jalpy quny 62,2 mlrd. teńge bolatyn múlikti zańdastyrdy, dep jazady LS memlekettik kirister komıtetine silteme jasap. Mekemeniń málimetteri boıynsha, 408 nysannyń 96 paıyzy turǵyn-úıler (páter, jeke úı j.t.b). Turǵyn úı nysandarynyń ortasha quny – 158,6 mln. teńge, al kommersııalyq nysandardyń ortasha quny – 35,4 mln. teńge. Mekemeniń túsindirýinshe, sheteldik múlikti alýshylardyń kóbi almatylyqtar. Olar árbir nysanǵa orta eseppen 334,2 mln. teńgeden jumsaǵan. Bul kórsetkish jaǵynan ekinshi orynda 72,7 mln. teńgemen astanalyqtar, úshinshi orynda 66,4 mln. teńgemen Aqtóbe oblysynyń turǵyndary tur. Sheteldegi qozǵalmaıtyn múlikke qarjy jumsaý jaǵynan eń tómengi kórsetkish Aqmola (2,5 mln. teńge) men Qostanaı (2,5 mln. teńge) jáne Pavlodar (1,6 mln. teńge) oblystaryna tıesili bolyp otyr. Eń qymbat satyp alýlar Ulybrıtanııada jasalǵan. Onda 22 nysanǵa 52,4 mlrd. teńge jumsalǵan. Onyń 52 mlrd. teńgesin 18 múlik nysanyn quraıdy. Ekinshi orynda Birikken Arab Ámirligi  (BAÁ). Onda zańdastyrylǵan 119 turǵyn-úıdiń baǵasy 5,7 mlrd. teńge kóleminde bolyp otyr. Bul eýropalyq memleketterden 10 ese az. Tirkelgen múlikter sany boıynsha Reseı kósh bastaýda. Onda 568 mln. teńgeniń 142 nysany bar. Al BAÁ men Túrkııada 808 mln. teńgeniń 36 nysany ornalasqan. Tap sol kezde Qazaqstannyń ózinde 1,3 trln. teńgeniń 150.8 myń nysany zańdastyrylǵan. Onyń 69 %-nyń ortasha quny 9,9 mln. teńgeni quraıtyn turǵyn-úıler. Al kommersııalyq nysandardyń quny 18,8 mln. teńgeni qurap otyr.