Belgili qazaqstandyq jattyqtyrýshy Bolat Esmaǵambetov Granatkın memorıaly týrnırinde Qazaqstan jastar quramasy penaltı serııasynda Reseıdi jeńedi dep úmittenedi. Bul týraly vesti.kz habarlady.
«Jigitter fınalǵa deıin jetken eken endi boılarynda qorqynysh sezimi bolmaýy tıis. Reseı ońaı qarsylas emes, alaıda jastarymyz Eýropanyń azýly ujymdaryn jeńip otyrǵanyn esten shyǵarmaý kerek. Endi tek sáttilikter tileımiz. Buǵan deıin naǵyz komanda ekendikterin dáleldeı bildi. Bul joly jeńimpaz penaltı serııasy arqyly da anyqtalyp qalar. Bálkim, birinshi soqqan komanda jeńiske jeter. Ne bolsa da, naǵyz teke-tirestiń bolary anyq. Biraq ulandarymyz bárin jospar boıynsha júzege asyrady dep oılaımyn», – dedi ol.
«Shabýylshy Erkebulan Seıdahmetti erekshe atap óter edim. Ony premer-lıgadaǵy komandalardyń birinde talantyn synap kórýge bolatyn sııaqty. Der kezinde dopty tartyp ala biledi. Bar jaýapkershilikti óz moınyna alyp, sheshýshi goldy soǵýǵa da qabiletti. Sondaı-aq, Aıdos Oraldyń da oıyny kóńilimnen shyǵyp júr. Týrnırde eki doptyń avtory atandy. Qarsylasynyń tegeýrindi shabýyldaryn toqtata biletin qorǵaýshy Dinmuhammed Qashken de bar. Jalpy, shabýylda da, qorǵanysta da, jartylaı qorǵanysta da kóshbasshy jigitter bar. Komandanyń bar júgi negizinen solarǵa artylady», – dedi Esmaǵambetov.
Týrnırdiń toptyq kezeńindegi oıyndarynan keıin Dinmuhammed Qashken «Astana» klýbymen jattyqqan. Alǵashynda aýyzsha kelisim bolǵanmen, bapkerler senim artpaǵan bolsa kerek, bul is zań júzinde júzege aspady.
«Komanda buǵan deıin bıikterden kórinbegennen soń talantyn durys baǵalamady dep oılaımyn. Týrnır kezinde oıynshynyń kóńilin basqa jaıtpen bólgen durys emes. Granatkın memorıalynyń fınalyna deıin jetýdiń qıyn ekendigin eskergen jón. Onyń ústine qazir «Astananyń» resmı oıyndary joq. Múmkin kelesi oqý-jattyǵý jıynynda jaqsy qyrynan kórinip qalar», – dedi ol.
Aıta keteıik, atalmysh jarystyń fınalynda Qazaqstan quramasy kórshiles Reseımen synǵa túsedi. Match 21 qańtar kúni Astana ýaqyty boıynsha saǵat 22:00-de ótedi.
Aleksandr Kýznesovtyń shákirtteri toptyq kezeńde Slovakııamen 0:0, Ázerbaıjanmen 2:2 esebimen teń oınasa, Lıtvadan 2:0 esebimen basym tústi. Shırek fınalda Slovenııany 2:0, jartylaı fınalda Grekııany 2:1 etip utty.
