Senatorlardyń aımaqtarǵa saparlary qorytyndylandy

Senat Tóraǵasy Qasym-Jomart Toqaev depýtattardyń aımaqtarǵa saparynyń nátıjelerin qorytyndylady. Senatorlar elimizdiń shalǵaı óńirlerinde 200-den astam kezdesý ótkizdi, dep habarlady osy palatanyń baspasóz qyzmeti. Senat Bıýrosynyń otyrysynda Tóraǵa saılaýshylarmen jumys babyndaǵy kezdesýler nátıjeli bolǵanyn, sharalar buqaralyq aqparat quraldarynda keńinen jarııa etilgenin atap ótti. «Aýyldar men qalalarda depýtattar eńbek ujymdarymen kezdesýler ótkizip,  mańyzdy máseleler boıynsha jurtshylyq pikirlerimen tanysty. Aldaǵy jumysta bizge jergilikti tur­ǵyndardy alańdatatyn máse­lelerdi zańnamalyq turǵydan sheshý múmkindikterin qaras­tyryp, qajet bolǵan jaǵdaıda kóte­rilgen máselelerdi ýaqy­tyn­da sheshýge yqpal etý úshin depýtattyq saýaldardy tıisti memlekettik organdarǵa ji­be­rýimiz kerek», – dep atap ótti Q.Toqaev. 2017 jylǵy jumysqa bıýro músheleriniń nazaryn aýdara otyryp, Senat basshysy Parlament aldaǵy ýaqytta mańyzdy qoǵamdyq-saıası bastamalar men aýqymdy sharalardy iske asyratynyn atap ótti. Olardyń ishinde konstıtýsııalyq zańdarǵa túzetýler engizýge, salyq jáne keden, jer qoınaýyn paıdalaný, jergilikti ózin ózi basqarý sekildi mańyzdy salalardy retteıtin zańnamaǵa ózgerister engizýge baǵyttalǵan zań jobalary bar. Bıylǵy jylǵy tamyz aıynda Álemdik jáne dástúrli dinder kóshbasshylary sezi Hatshylyǵynyń kezekti otyrysy men Pagýosh qozǵalysynyń konferensııasy bolady. Bıýro músheleri Senattyń 26 qańtarda bolatyn otyrysynyń kún tártibin kelisti. Senatorlar «Sot-saraptama qyzmeti týraly» zań jobasyn jáne oǵan ilespe zań jobasyn birinshi oqylymda qaraıtyn boldy. Depýtattar sondaı-aq jaıylymdar týraly jáne zańnamaǵa jaıylymdardy paıdalaný má­se­leleri boıynsha túzetýlerdi (ekinshi oqylymda) talqylaıdy. Áleýmettik-mádenı damý jáne ǵylym komıteti Qazaqstan Úkimeti men Bilim, ǵylym jáne mádenıet máseleleri jó­nin­degi Birikken Ulttar Uıymy (IýNESKO) arasyndaǵy Qazaq­standa Ortalyq Azııa óńirlik glıasıologııalyq ortalyǵyn qurý týraly kelisimdi ratıfıkasııalaý týraly zań jobasyn odan ári pysyqtaýda bas komıtet bolyp belgilendi.