Parlamenttiń Úkimetke qatysty róli qaıta qaralýǵa tıis - Elbasy

Memlekettik bılik tarmaqtary arasynda ókilettikterdi qaıta bólý máseleleri jónindegi jumys tobynyń otyrysyna qatysqan Nursultan Nazarbaev otyrysta memlekettik bıliktiń tarmaqtary arasynda ókilettikterdi qaıta bólý máselesi respýblıka damýynyń júıeli jáne zańdy kezeńi bolyp tabylatynyn atap ótti, dep habarlady Aqordanyń baspasóz qyzmeti. – Men usynǵan bes ınstıtýsıonaldyq reformanyń birin iske asyrý Úkimetke ekonomıka salasynda qosymsha atqarýshylyq ókilettikter berýdi kózdeıdi. Bul oraıda qorǵanys qabiletiniń, syrtqy saıasattyń, memlekettik basqarýdyń, Konstıtýsııany qorǵaýdyń jáne memlekettik bılik tarmaqtary arasynda tıimdi jumysty qamtamasyz etýdiń negizgi máseleleri Prezıdenttiń quzyrynda qala beredi, – dedi Nursultan Nazarbaev. Memleket basshysy áýel bastan Qazaqstan Prezıdentiniń erekshe quzyryna jatqyzylǵan ókilettikter sanynyń azaıatynyna nazar aýdardy. – Mysaly, baǵdarlamalardy bekitý, Úkimettegi kadrlyq ózgerister máseleleri, jańa basqarý organdaryn qurý Úkimet pen Parlamenttiń quzyryna berilýi múmkin, – dep atap ótti Nursultan Nazarbaev. Sondaı-aq Qazaqstan Prezıdenti memlekettik basqarý júıesinde Parlamenttiń rólin pármendi túrde qajettigin atap ótti. – Bizdiń jaǵdaıda Úkimet jeńiske jetken partııadan nemese fraksııadan jasaqtalady. Osylaısha, kóptegen máseleler boıynsha Parlamenttiń Úkimetke qatysty róli qaıta qaralýǵa tıis, – dedi Memleket basshysy. Buǵan qosa, Nursultan Nazarbaev júrgizilip otyrǵan reformalar men olardyń sátti iske asyrylýyna memlekettik organdardyń jaýapkershiligi máselesine arnaıy toqtaldy.