Álemdegi úzdik qorǵaýshylardyń biri komandasyz qalýy múmkin

Italııanyń «Iýventýs» klýbyna jalǵa berilgen marokkalyq qorǵaýshy Mehdı Benatıa jaqyn arada komandasyz qalýy múmkin. Kelisimsharty «Bavarııaǵa» tıesili ol bul komandaǵa qaıtyp oralmaıtyn boldy, dep habarlady eurosport.ru. «Roma» sapynda júrip, erekshe oıynymen kózge túsken ol 2014 jyly Eýropanyń birqatar klýbtarynan usynys túskendikten Germanııanyń «Bavarııa» ujymyna aýysýǵa bel baılaǵan. Transfer quny 26 mıllıon eýrony qurady. Alaıda, nemis komandasynda qaıta-qaıta jaraqat alǵandyqtan baǵy janbaı, negizgi quramnan shet qalyp jatty. Munda ol eki maýsymda bas-aıaǵy 29 oıynǵa qatysyp, 2 goldyń avtory atanǵan. Bul maýsymdy «Iýventýste» bastaǵan ol jóndi oıynyn kórsete almaı keledi. Osyǵan baılanysty «Bavarııa» oıynshymen jasalǵan kelisimshartty buzýdy josparlap otyr. Málimetterge sáıkes, marokkalyqqa Reseıdiń «Spartak» komandasy qyzyǵýshylyq tanytyp otyr.