Byltyr Pavlodarda ótken bokstan el chempıonaty, ulttyq quramany olımpıadadan soń qaǵyp-silkip alýǵa tamasha múmkindik boldy. Ár olımpıada nemese álemdik doda aıaqtala salysymen, ulttyq quramaǵa ózgeris kerek dep jatamyz ǵoı. Bul joly qurama onsyz da jańarǵaly tur eken. 49 kıloda úsh olımpıada oıyndaryna qatysyp, shırek fınalda súringen Birjan Jaqypov pen 60 kıloda atoı salǵan Berik Ábdirahmanov rıngpen qosh aıtysty. Biri basshy bolyp ta úlgerdi. Biri múmkin bapker bolar. Al 52 kıloda bokstasqan Oljas Sáttibaev endi WSB jobasyndaǵy «Astana Arlandary» boks klýbynyń múshesi hám kapıtany. Quramaǵa onyń ornyna myqty boksshy kerek.
Áýesqoı boksshy alýy qajet ataqtyń bárin ıelengen Danııar Eleýsinovtiń (69 kılo) kásipqoıǵa ketem degen sheshimi quptaýǵa turarlyq. Áýelgi kezdesýine Shanhaıda shyǵady depti resmı derek kózderi.
Qos olımpıadanyń qolasyn taqqan Dychko da áne-mine kásipqoı boks álemine ketedi degen sóz jeldeı eskeni qashan. Demek, bul jaǵdaıattardy ájeptáýir ózgeris dep aıta alamyz. Osydan soń quramadaǵy ózge jigitter de «salmaq qosty». Ilııas Súleımenov 56-ǵa, Abylaıhan Júsipov 69-ǵa, Jánibek Álimhanuly 81-ge aýysty. Bas bapker Myrzaǵalı Aıtjanov qazir ózgergen qurammen birge AIBA boks akademııasynda daıyndyqqa kirisip ketti.
Endi negizgi taqyrypqa oıysaıyq. Arysy 2000, berisi 2004 jyldan bastap olımpıadadaǵy «qazaqtyń salmaǵy» 69 kılonyń qaharmanyna aınalǵan Danııar oryn bosatqannan keıin, bul salmaqqa úmitker kim degen zańdy saýal qoıylary sózsiz. Á degende eske eki bylǵary qolǵap sheberi túsedi. Olar: Abylaıhan Júsipov (20 jas) pen Sadrıddın Ahmedov (19 jas). Ekeýi de 20-ǵa kelip jalyndap turǵan, sen tur men ataıyn jigitter. Sıdneıdegi Ermahan, Afınydaǵy Baqtııar, Beıjińdegi Baqyt, Londondaǵy Serik, Rıodaǵy Danııar salǵan dańǵyldy Tokıoda kim laıyqty jalǵastyra alýy múmkin? Abylaıhan ba álde Sadrıddın be?
Baýyrjan Amanbaev pen Andreı Raıshtan tálim alatyn Abylaıhan jasóspirimder arasynda júrgen shaǵynda jeńilistiń dámin tatyp, tuzyn baıqap kórmegen bala edi. QR chempıony degen ataqtaryn bylaı qoıǵannyń ózinde, túrli halyqaralyq báıgelerdiń aldyn bermeı kele jatqan tulpar retinde kózge ilikti. Biraq, eresekterge aýysa salysymen Rıo dodasyna túsip, jeńildi. Rıngtegi qımyly men boksshylyq áleýeti týraly áńgime qylmaı turyp, kópke tanymal emes, biraq boks mamandarynyń joǵary baǵasyna ıe bolǵan Sadrıddın Ahmedov týraly da syr sherte keteıik. Maqtaaraldyń týmasy da san túrli qurlyqtyq hám álemdik básekelderdiń altynyn óńirinde jarqyratypty. 2015 jyly Ahmet Komert memıoralynyń bas júldesin, 2016 jyly Klıchko týrnıriniń bas báıgesin, Golden Glove of Vojvodina halyqaralyq básekesiniń altynyn qanjyǵaǵa bóktergen. Biraz aı buryn ǵana Reseıge baryp, jastar arasyndaǵy álem chempıony degen mártebeli ataqty da ıelenip qaıtty.
Bokstasý tásilderi
Abylaıhan Júsipov. Sharshy alańǵa shyqqan bette birinshi nómirmen qımyldaýǵa áreket jasaıdy. Aıaqpen jaqsy oınaıdy. Boks mamandary men jankúıerler osy qasıeti úshin ony Serik Sápıevke uqsatyp jatady. (Aıtpaqshy, ekeýi de Abaı aýdandyq boks mektebiniń túlegi). Oń qolymen qarsylasyn shalǵytyp, sol qolymen qatty jáne dál soqqylar jasaıdy. Qorǵanysta qatelikter jibergenimen, aıaǵynyń jyldamdyǵy arqasynda qarsylastyń soqqysynan jaltaryp kete alady. Sadrıddın Ahmedov. Rıngte ózin rıng qojaıyny retinde erkin sezinedi jáne qarsylasqa reti kep tursa birinshi bolyp soǵýǵa umtylady. Qarsylasy shabýylǵa shyqqanda jáne qorǵanysy ashyq qalǵanda serııaly soqqylar jasap qalýǵa tyrysady. Fızıkalyq daıyndyǵy myqty, ashyq shaıqastan qashpaıdy. Urys máneri kásipqoı boksshylarǵa keledi. Abylaıhan aýyr soqqyny sol qolymen jasasa, Sadrıddın kerisinshe eki qolmen de urady. Oń qolynyń soqqysy sol qolyna qaraǵanda áldeqaıda aýyr.Jetistikteri
Abylaıhan Júsipov: jasóspirimder arasynda QR chempıony (2013), Azııa jáne álem chempıony (2013); jastar arasynda QR chempıony, halyqaralyq týrnırdiń jeńimpazy (Germanııa, 2014), Azııa jáne álem chempıony (2014), jastar arasyndaǵy olımpıadanyń jeńimpazy (2014), eresekter arasynda Ǵ.Jarylǵapovty eske túsirýge arnalǵan halyqaralyq týrnırdiń jeńimpazy (Qaraǵandy, 2014), Mınsk (2015) jáne Ǵ.Jarylǵapov týrnırleriniń qola júldegeri (2015), Vengrııa (2016) jáne Qytaıda ótken azııalyq irikteý týrnırleriniń jeńimpazy (2016). Eresekter arasynda Qazaqstan chempıony, Pavlodar (2016). Sadrıddın Ahmedov: jastar arasyndaǵy Qazaqstan chempıony (2011), jastar arasyndaǵy Qazaqstan chempıonynyń kúmis júldegeri (2012), jastar arasyndaǵy Qazaqstan chempıonatynyń qola júldegeri (2013), jastar arasyndaǵy Qazaqstan chempıony (2014), Ahmet Komert memıoralynyń jeńimpazy (2015), jastar arasyndaǵy Qazaqstan chempıony (2015), aıyǵndy Klıchko týrnıriniń jeńimpazy (2016), Ispanııadaǵy halyqaralyq týrnırdiń chempıony (2016), Serbııada ótken 34-shi Golden Glove of Vojvodina halyqaralyq týrnıriniń jeńimpazy (2016), jastar arasyndaǵy Qazaqstan chempıony (2016), jastar arasyndaǵy Álem chempıony (Sankt-Peterbýrg 2016).Túıin
Abylaıhan Júsipov eresekter quramasyna Sadrıddınnen 2 jyl erte aýysqany bolmasa, eki boksshynyń áleýeti birdeı. Degenmen, dál qazirgi sátte 69 kelide Ulttyq quramanyń birinshi nómirli boksshysy Abylaıhan Júsipov bolýy múmkin. О́ıtkeni, ol 2016 jylǵy bokstan QR chempıony. Al, Sadrıddın jastar quramasynan eresekter quramasyna bıyl qosyldy. 2017 jyldyń enshisinde halyqaralyq iri týrnırlerden bólek, Álem jáne Azııa chempıonaty bar. Qaı chempıonatqa kim baratynyn jáne birinshi nómirli boksshy kim bolatynyn Ulttyq qurama bapkeri Myrzaǵalı Aıtjanovtyń ózi tańdaıtyn bolady. Al qurmetti oqyrman, Sizdiń oıyńyzsha kim birinshi nómirli boksshy bolýǵa laıyqty? Álı Bıtóre, jýrnalıst
