«Astana Arlans» jańa maýsymyn bastaıdy

Almatyda Bokstyń búkilálemdik serııasyndaǵy jetinshi maýsymynyń jáne WSB-nyń eki dúrkin jeńimpazy «Astana Arlans» komandasynyń jańa quramynyń tusaýkeser rásimi bolyp ótti. Belgili jarystyń formatyna, birqatar klýbtar qysqarýy sebepti, aıtarlyqtaı ózgerister bar. Endi 12 komanda qurlyqta ornalasý yńǵaıyna qaraı úsh topqa bólinip, keıin ár toptyń jeńimpazdary bir-birimen kezdesedi. «S» tobyndaǵy «Astana Arlans» Azııanyń «Russian Boxing Team», «China Dragons» jáne «Uzbek Tigers» komandalarymen baq synasady. Jańa maýsym aqpan aıynda bastalyp, ár toptyń jeńimpazdary sáýir aıynda bolatyn pleı-offqa deıin anyqtalýy tıis. Al fınaldyq jekpe-jekter maýsym aıynda ótedi. Shırek fınalǵa toparalyq saıystardan eki jeńimpaz jáne úshinshi oryn alǵan eki klýb ótedi. Aıta ketý kerek, maýsymdar aralyǵynda «Astana Arlans» klýbynyń quramynda birshama ózgerister boldy. Basshylar klýbty yqshamdaý týraly sheshim qabyldap, bıyl komanda quramynda el namysyn byltyrǵydaı otyz emes, jıyrma boksshy qorǵaıtyn boldy. Klýbtyń bas menedjeri Serik Sápıevtiń aıtýynsha, jańa maýsymda klýb quramynda elimizdiń eń bir myqty degen boksshylary óner kórsetedi. Olardyń ishinde jaqynda ótken Qazaqstan chempıonatynyń jeńimpazdary men júldegerleri, Rıo olımpıadasyna qatysqandar da bar. Uıymdastyrýshylar bıylǵy maýsymǵa josparlaǵan ıgi isterdiń biri – bokstyń óńirlerde damýyna yqpal etý maqsatynda komandalyq kezdesýler elimizdiń birneshe qalasynda ótkiziledi. Taǵy bir jańalyq – buǵan deıin Qazaqstan qurama komandasynda 52 kılo salmaq dárejesinde óner kórsetken, WSB-nyń besinshi maýsymynyń jeńimpazy, Rıo olımpıadasyna qatysýshy Oljas Sáttibaev komanda kapıtany bolyp saılandy. «Astana Arlans» komandasynyń jańa maýsymdaǵy quramynda, sonymen qatar, WSB-nyń besinshi maýsymynyń jeńimpazy Temirtas Júsipov (49 kg deıin), London olımpıadasyna qatysýshy, byltyrǵy el chempıonatynyń júldegeri Ilııas Súleımenov (56 kg deıin), el chempıonatynyń kúmis júldegeri, WSB-nyń 2015 jylǵy chempıony Zakır Safıýllın (60 kg deıin), WSB-nyń 2015 jylǵy jeńimpazy,  WSB-nyń 2016 jylǵy boljamy boıynsha Azııanyń úzdik boksshysy Aslanbek Shymbergenov (69 kg deıin), A.Qulybaev atyndaǵy  halyqaralyq týrnırdiń jeńimpazy, bıylǵy el chempıonatynyń kúmis júldegeri, WSB-nyń 2015 jylǵy jeńimpazy Qanaǵat Maralov (69 kg deıin), Ýnıversıada júldegeri, WSB-nyń 2015 jylǵy jeńimpazy Nurdáýlet Jarmanov (81 kg deıin) sııaqty daryndy boksshylar óner kórsetedi. «Astana Arlans»  jetinshi maýsymnyń alǵashqy matchyn 4 aqpan kúni «Russian Boxing Team» klýbymen ótkizedi. Ánýar Abdrahmanov