Elbasy: Ýnıversıadada quramamyz barlyǵymyzdy qýantady dep senemin

Prezıdent Nursultan Nazarbaev Búkilálemdik 28-shi qysqy Ýnıversıada dodasynda el namysyn qorǵaıtyn sportshylarymyzǵa sáttilik tiledi. «Qurmetti jas dostar, sportshylar! Búgin jastar úshin úlken mereke. Elimizdiń eń basty ýnıversıtetinde búgin Ýnıversıada alaýy jaǵylady. Osy tórt-bes kúnniń ishinde osy Alaý búkil Qazaqstandy sharlap shyǵyp, eldiń sportshylarymyzǵa degen tilegin, armanyn qabyl alasyńdar. Sondyqtan ol jeńiske jetýge kómegin tıgizetin bolady», - dedi Elbasy. Memleket basshysynyń aıtýynsha, mundaı joǵary deńgeıdegi sporttyq dodanyń Qazaqstanda ótýi úlken abyroı. «Bul shara - tuńǵysh ret táýelsizdik jyldary ishinde jetken jetistigimizdiń biregeıi, mundaı dúnıejúzilik dodany biz eshqashan ótkizip kórgenimiz joq. 57 eldiń sportshylary keletin bolady. 170 memlekettiń ishinen ótkizý quqyǵyna ıe boldyq. Bul, birinshiden, bizdiń elimiz úshin úlken abyroı. Qazaqstandy taǵy da barsha elderge pash etemiz, myńdaǵan jýrnalıster bolady. Ekinshiden, jastardy sportqa baýlıdy. Úshinshiden, salǵan jańa sport keshenderdiń barlyǵy bolashaqtaǵy elimizdiń sportshylaryna qyzmet etedi. Bizdiń 168 múshesi bar quramamyz alǵa sýyrylyp, barlyǵymyzdy qýantady dep senemin! Sizderge zor tabys tileımin, órkenderińiz óse bersin!», - dedi N. Nazarbaev.