О́zbekstanda Tuńǵysh Prezıdentti eske alý kúni jarııalandy

О́zbekstan basshysy Shavkat Mırzııoev 25 qańtar kúni «О́zbekstan Respýblıkasynyń Tuńǵysh Prezıdenti Islam Ábdiǵanıuly Karımovti máńgi este saqtaý týraly» qaýlyǵa qol qoıdy. Ol qujatqa sáıkes, Islam Karımov qaıtys bolǵan kún – 2 qyrkúıek О́zbekstanda «Tuńǵysh Prezıdentti eske alý kúni» dep jarııalandy. Qujatta О́zbekstanda jyl saıyn 30 qańtarda Islam Karımovtiń týǵan kúni atalyp ótedi delingen. Sonymen qatar, О́zbekstan basshysy Samarqandaǵy I.Karımov jerlengen alańǵa memorıaldy keshen salýdy jáne Tashkent, Samarqan men Qarshy qalalarynda tuńǵysh prezıdentke arnap eskertkish turǵyzýdy tapsyrdy. Budan bólek, qaýlyǵa sáıkes, О́zbekstannyń tuńǵysh prezıdenti uzaq jyl qyzmet atqarǵan Oksaroı rezıdensııasynda Islam Karımov atyndaǵy Ǵylymı-aǵartýshylyq memorıaldy keshen qurylyp, sol jerde Islam Karımov atyndaǵy Respýblıkalyq qaıyrymdylyq qoǵamdyq qor jumys isteıtin bolady. Shavkat Mırzııoevtiń qaýlysymen Samarqanda Islam Karımov atyndaǵy mýzeı ashylyp, Tashkent memlekettik tehnıkalyq ýnıversıteti, Asaka qalasyndaǵy avtomobıl zaýyty, Ferǵanadaǵy Mádenıet saraıy men Tashkent halyqaralyq áýejaıy tuńǵysh prezıdenttiń atymen atalady. Sondaı-aq qujatta eldegi birqatar oblystar men Tashkenttegi kóshelerge I.Karımovtiń atyn berý týraly jazylǵan. Budan bylaı joǵary oqý oryndarynyń stýdentterine О́zbekstan basshysynyń qaýlysymen Islam Karımov atyndaǵy Memlekettik shákirtaqy taǵaıyndalady. Aıta ketý kerek, táýelsiz О́zbekstan Respýblıkasynyń tuńǵysh prezıdenti Islam Ábdiǵanıuly Karımov 2016 jyldyń 2 qyrkúıeginde 79 jasqa qaraǵan shaǵynda dúnıe saldy