Mańǵystaýda jyldyń alǵashqy úshemi ómirge keldi

Bir qyzyǵy, ana qursaǵyndaǵy sábılerdiń úshem ekenin dárigerler ota jasaý kezinde bir-aq bilgen! Oǵan deıin birneshe ret ÝZI apparatyna túsip, qursaǵynda egiz sábı baryn bilgen 34 jastaǵy Aqmaralǵa da úshemdi ómirge ákelý tosyn syı bolsa kerek. Taýyq jylynyń alǵashqy úshemi ómirge osylaısha ata-anasy men baýyrlaryn da, dárigerlerdi de tańǵaldyryp keldi. Aldymen ómirge kelgen qyz balanyń salmaǵy 2 keli 480 gramm bolsa, er bala  2 keli 220 gramm salmaqpen týylǵan, al «jasyrynyp» kelgen úshinshi sábı – qyz balanyń salmaǵy 1 keli 950 gramm bolǵan. -Mańǵystaý oblystyq perınataldyq ortalyqqa Mańǵystaý aýdanynan kelgen ananyń qan qysymy 180/100-ge deıin kóterildi.   Jaǵdaı qaýipti bolǵan soń oǵan ota jasaldy. Ota barysynda úshinshi balanyń bar ekeni anyqtaldy. Qazirgi tańda úshemniń anasynyń da, sábılerdiń de densaýlyqtary jaqsy. Úshemder eki aptadaı  dárigerlerdiń baqylaýynda bolyp, salmaq jınaqtap, tekserýden ótti. Búgin anasy men úshemderdi otbasyna shyǵaryp salyp jatyrmyz, deıdi oblystyq perınataldyq ortalyǵy bas dárigeriniń emdeý isi jónindegi orynbasary Japyraq Epenova. Otasqandaryna 12 jyl bolǵan, buǵan deıin otbasynda 4 ul bala tárbıelep otyrǵan Janserik Tuıaqbaev pen Aqmaral Jaljanovanyń otbasyna Mádına, Ádına esimdi qyz balalar men Nurıslam atty ul qosyldy. Ata-ananyń armany olardy ımanı jolmen tárbıelep-ósirý. Mańǵystaý oblystyq Densaýlyq saqtaý basqarmasy baspasóz qyzmetiniń habarlaýynsha, atalmysh ortalyqta jyl basynan beri 400-ge jýyq bala dúnıe esigin ashqan. Al, ótken jyly óńirde 20 myń sábı ómirge kelgen bolsa, onyń 7650-i oblystyq perınataldyq ortalyqta dúnıege esigin ashqan. Olardyń ishinde úsheýi úshem, al 78-i egizder. Gúlaıym ShYNTEMIRQYZY, «Egemen Qazaqstan». Mańǵystaý oblysy