Qazaqstan men Polsha arasynda tikeleı áýe baǵyty ashylady

Qazaqstan men Polsha arasynda tikeleı áýe baǵyty ashylady. Varshavadan Astanaǵa birinshi sapar 8 mamyrǵa josparlanǵan. Bul týraly Ortalyq kommýnıkasııalar qyzmetinde ótken baspasóz konferensııasynda Polshanyń LOT áýe kompanııasynyń prezıdenti Rafal Mılcharskı málimdedi. Ol eki el arasynda áýe qatynasyn ornatý týraly sheshimge Qazaqstan Prezıdentiniń byltyrǵy Polshaǵa jasaǵan sapary aıasynda qol jetkizilgenin atap ótti. «Polsha men Qazaqstan arasyndaǵy tikeleı áýe baǵyttaryn iske qosý eki el arasyndaǵy yntymaqtastyqtyń 25-jyldyǵymen sáıkes kelýi kezdeısoq emes. Biz Qazaqstannan Polshaǵa baratyn jolaýshylar aǵynynyń jáne sáıkesinshe Qazaqstannyń qandaı ekenin kórgisi keletin polıaktar sanynyń artýyna yqpal etemiz, – dedi R.Mılcharskı. – Áýe qatynastary eki el arasyndaǵy ekonomıkalyq, mádenı baılanystardy arttyrýǵa, sondaı-aq bilim berý salasyndaǵy áriptestikti kúsheıtýge baǵyttalǵan». Kompanııa prezıdentiniń aıtýynsha, Qazaqstan jolaýshylary LOT-tyń usynysy arqyly tek Varshavaǵa ǵana emes, sondaı-aq Krakov, Vroslav, Gdansk nemese Poznan sekildi Polshanyń ózge de qalalaryna barýlaryna bolady. Sondaı-aq Brıýssel, Býdapesht, Býharest, Gambýrg, Mılan, Mıýnhen, Praga, Rıga, Stokgolm jáne Vılnıýs sııaqty qalalarǵa da aýysyp otyrý arqyly áýe qatynasy júzege asyrylady. «Varshavadan Astanaǵa birinshi sapar 8 mamyrǵa josparlanǵan. Baǵyt sáýir aıynda LOT áýe komnapııasy alatyn Boeing 737NG ushaǵymen júzege asyrylatyn bolady. Polsha tasymaldaýshysy Astanaǵa aptasyna 4 ret ushady. Dúısenbi, sársenbi, juma jáne senbi kúnderi ushaqtar Varshavadan 22:50-de ushyp, Astanaǵa tańǵy 07:45-te keledi. Keri sapar seısenbi, beısenbi, senbi jáne jeksenbi kúnderi saǵat 13:00-de júzege asady. Varshava áýejaıyna ushyp kelý ýaqyty – jergilikti ýaqyt boıynsha 14:15-te», – dep atap ótti R.Mılcharskı. Aıdar О́risbaev, "Egemen Qazaqstan".