Kásip bastaý úshin qansha qarjy kerek?

Kásibin bastaýǵa kirisken kásipker ony zańdastyrý úshin eń aldymen tirkelip, jeke kásipker kýáligin alǵan jón, oǵan shamamen 20 myń teńge aqsha ketedi, dep jazady palata.kz. Turǵylyqty aımaq boıynsha salyq organyna jeke kásipkerdi tirkeýge qoıý úshin arnaıy salyqtyq ótinish jazylady. Bul ótinish salyq organyna qabyldanǵannan keıingi úsh kún ishinde jeke kásipkerdi salyq tóleýshi retinde tirkeý júrgiziledi jáne oǵan jeke kásipker retinde memlekettik tirkeýge alynǵany jóninde arnaıy kýálik beredi. Kásipker salyq organyna salyqtyq ótinishten bólek jeke kýáligi kóshirmesin, 3,5h4,5 fotosýretin, dara kásipkerdi memlekettik tirkegeni úshin tólegen alym somasyn rastaıtyn túbirtek-qujat, turǵylyqty jerin rastaıtyn qujat usynady. Osy arada aıta keter jaı, mundaı alym bir ret tólenedi. Onyń kólemi 2 aılyq eseptik kórsetkish mólsherinde eseptelgen. Bul alymnan sharýa qojalyqtary, fermerler men I, II, III toptaǵy múgedek adamdar, QR azamattyǵyn almaǵanǵa deıin kásipkerlik qyzmetin bastaǵan oralmandar bosatylǵan. Atalmysh basqarma mamandarynyń aıtýynsha, keıbir jaǵdaıda, kásipkerlik qyzmettiń erekshelikterine baılanysty salyq organyna tirkeý merzimi 5-11 kún aralyǵynda júrgizilýi múmkin. Jeke kásipkerlikti memlekettik tirkeý tártibi Qazaqstan Respýblıkasynyń «Jeke kásipkerlik týraly» Zańynyń 27-babynda jan-jaqty jazylǵan. 2017 jyldyń 1-qańtarynan bastap jeke kásipkerlikti ashýda oń ózgerister jasaldy. Endi jeke tulǵalar jeke kásipkerlik ashý úshin ótinish emes, jeke kásip ashyp bastaǵany týraly habarlama jasasa bolǵany. Atalmysh habarlama kásipker retinde tirkelýdi qamtamasyz etedi. Eger jeke kásipkerlik birlesken bolsa, onda kásipkerliktiń ýákiletti ókili qalǵan múshelerdiń qoly bar senimhatty kórsetedi. Bul tizimge salyq túrlerin, keńse jaldaý qunyn, eń bolmaǵanda 1 qyzmetker jalaqysy (jeke kásipkerlikte eń bolmaǵanda esepshi qajet), jarnama úshin bastapqy kapıtal qajet. Bloknottaǵy bıznes-jospar Jeke bıznesti ashýda eń mańyzdysy júıeli bıznes-jospar qurý. Shaǵyn kásipkerlikte bıznes jospar aıtarlyqtaı qajet emes. Alaıda ár qadam boıynsha jazylǵan áreket syzbańyz bolsa qarjyny únemdeýge, durys jumsaýǵa, isińizdegi júıelilikke, bıznesti órge dóńgeletýge septigin tıgizedi. Meıli bıznes-josparyńyzdy qarapaıym bloknotqa jazyp, kúnbe kún jasaǵan áreketterdi, jumsalǵan qarjyny túrtip otyryńyz. Máselen, kásip bastamaq salany tereń zerttep, búge-shigesine deıin bilý, ár tıyn shyǵynyn esepteý qajet. Onsyz bıznes júrmeıdi. Motıvasııa men alqashqy kapıtal Jańa kásipti bastaý, ony turaqty júrgizýge aldymen jattyǵý kerek. Ádetten tys erte oıaný, barlyǵyn qaperde ustaý, seriktestermen belgilengen ýaqytta kezdesý, salyqtar, tólemder men jalaqyny ýaqytynda tóleýdi daǵdyǵa aınaldyrý kerek. Alǵashqy kapıtal qaǵazbastylyq, salyq, bir-eki aıǵa shamamen ketetin shyǵyndy qosa eseptegende artyǵymen bolýy shart. Olaı bolmaǵanda qaryzǵa kirý qaýipi bar. Al qaryz, nesıe alý jańadan qurylyp kele jatqan bızneske kedergi, tipti sońy bolýy múmkin. Jańa kásipti súıý qajetti aspekt. Shabyt pen qulshynys arqyly jańa ıdeıalar, qııaldar týady. Kúndelikti motıvasııa men affırmasııalar sizdi kerek arnaǵa salady. Versus qoldanbaly jetistik akademııasy Vertex kýrsynyń jeńimpazy atanyp, Foodtruck bıznes-jobasynyń ıesi Darhan Kárimov: «Qaı salada kásip ashasyz, qarjynyń kólemi soǵan baılanysty. Al jalpy alǵanda, meniń oıymsha, qarjysyz da kásip ashýǵa bolady. Mysaly, beınerolık túsiretin kompanııa ashý úshin qandaı qarjy kerek? Eshqandaı. Tapsyrys alasyz da, qajetti mamandardy jaldap jumys isteı beresiz. Tek jeke kásipkerlik retinde tirkelý úshin ǵana aqsha kerek. Onyń ózi kóp qarjy emes qoı». Marketıng pen jarnama Bir qaraǵanda bıznes pen medıa quraldary arasynda aıtarlyqtaı baılanys joq bolyp kórinedi, alaıda bul olaı emes. О́ziniń jeke kásipkerligin bastaǵaly otyrǵan yntaly adamǵa jarnama, mýltımedıalyq múmkindikter men logıstıkalyq quraldar aýadaı qajet. Jeke kásipkerlikte áleýmettik jelilerdiń kómegimen tegin jarnama jasaýǵa bolady. Jarnama qashanda bolǵan, tek zamanyna saı berý formalary men mazmuny aýysyp otyrǵan. Sondyqtan kez kelgen startap óziniń laıyqty aýdıtorııasyn taýyp, úlken suranysqa ıe bolýy úshin kásipkerler belgili bir medıa platformalarynda utymdy ınnovasııalyq joldardy oılastyrýy qajet. Naryq qalaıtyn ónimderdi shyǵarý arqyly tıimdi bıznes salasyn qurý otandyq jáne sheteldik satý alańynda súbeli oryn enshileıtini sózsiz. Tipti qolyńyzdaǵy uıaly telefon arqyly da janramalaýdy jolǵa qoıýǵa ábden múmkin. Aqparattyq-tehnologııalyq aǵymda meńgerilgen kommýnıkasııalar bul máseleler sheshimin tabady. Ol úshin veb-jobalar, oqylymdy kontent, jarnama aımaǵy qajet. Sonymen... Súıikti ispen aınalysý, ýaqyt pen qarajatqa qojaıyn bolý, tabysqa kenelý, baı-qýatty ómir súrý, armandar men maqsattarǵa qol jetkizý – sátti qurylǵan bıznestiń jemisi. Kez kelgen bıznes ashý úshin qarajat kerek. Kapıtalyńyz 100 myń teńge bolsa – qara bazarda belgili bir taýardy alyp satýǵa bolady. 1 mln teńgege franshıza satyp alýǵa bolady. Kásibińizdiń kólemine qaramastan 1:3 formýlasyn este saqtańyz. Máselen, 100 000 teńge jáne 300 000 teńge. Birinshi soma shaǵyn bıznes ákeletin taza tabys bolsa, ekinshisi orta eseppen jeke kásipkerlikti bastaý úshin kerek soma. Kásipkerlikte aıtarlyqtaı tájirıbeńiz joq bolsa, táýekelderdi azaıtý úshin neǵurlym az qarjy ketetin kásip túrin tańdańyz. Biliksiz bızneske sońǵy aqshany salý – aqymaqtyq. Álııa Kemelbekova