Shymkenttegi kólik-logıstıkalyq ortalyǵynyń qurylysy 2019 jyly aıaqtalady

Shymkentte salynyp jatqan kólik-logıstıkalyq ortalyǵynyń qurylysy 2019 jyly aıaqtalady dep kútilýde. Bul týraly «Kóliktik-logıstıkalyq aımaq» jetekshi kompanııasynyń ókilderi málimdedi, dep habarlaıdy QazAqparat. Halyqaralyq deńgeıdegi nysannyń qurylysy 2014 jyly bastalǵan bolatyn. Alaıda, ulttyq valıýtanyń qunsyzdanýynan nysandy tapsyrý merzimi keıinge shegerildi. Al «Qazaqstan Logıstıka Grýpp» kompanııasy tarapynan qarjylandyrylǵan nysan salynyp bitken. Osy jyldyń mamyr aıynda Qazaqstannyń Damý bankiniń qoldaýymen nysannyń birqatar bóligin salyp bitirý josparlanyp otyr. «Bul jerde negizinen «A» sanattaǵy qoımalar bolady. Onda qurǵaq, klımattyq qoımalar men konteınerlik alańdar, ákimshilik ǵımarat boı kóteredi. Qurǵaq qoımalarda halyq tutynatyn taýarlar,  ózgesinde et-sút ónimderi, kókónister men jemis-jıdekter saqtalady», – dedi joba jetekshisi Dıas Ermekbaev. Quny 15 mlrd 796 mln teńge bolatyn joba shekara mańyndaǵy Ońtústik Qazaqstan oblysynyń taýar aǵynyn óńdeý boıynsha ınfraqurylymǵa degen artyp otyrǵan qajettilikterge baǵdarlanǵan. QDB tarapynan qarjylandyrý Memlekettik ındýstrııalyq-ınnovasııalyq damý baǵdarlamasynyń ekinshi besjyldyǵy aıasynda usynyldy. 15 jylǵa deıingi merzimge berilgen qaryz somasy 11,8 mlrd teńgeni quraıdy. «8 jobaǵa 24 mlrd teńge kóleminde ınvestısııa salynbaq. Onyń ishinde 250 sharshy metrine qoımalar salynady. Sondaı-aq «Bıznestiń jol kartasy» baǵdarlamasy aıasynda ınfraqurylym, elektr jaryǵy, káriz júıesine, temir jol salýǵa qarjy qarastyrylǵan. Búginde aımaqty elektr jaryǵymen qamtamasyz etetin stansa daıyn bolyp qaldy», – dedi «Saýda-logıstıkalyq aımaǵy» kompanııasynyń atqarýshy dırektorynyń orynbasary Erǵalı Bektaev. Aıta keteıik, túrli júkterdi saqtaý jáne qaıta óńdeý boıynsha OQO qajettiligi 1 mıllıon sharshy metrdi quraıdy. Bul rette óńirdegi júk aınalymy qarqyndy óse túsýde: 2011 jyly bul kórsetkish 111,1 mln tonnany qurasa, 2012 jyly – 123,8 mln tonna, 2013 jyly – 132,9 mln tonna, 2014 jyly – 145 mln tonna, 2015 jyly 154,6 mln tonna boldy.