Elimizdiń saıası táýelsizdigi jolynda kúresip, rýhanı mádenıetimizdiń kóshbasshysy bolǵan Ahmet Baıtursynulynyń esimi men eńbekterin uzaq ýaqyt boıy aıtýǵa tyıym salyp, «tumshalap» kelgenimen, aıtýly tulǵa eńbegi halqy úshin máńgilik óshpeıtindigin moıyndatty.
A. Baıtursynuly murajaı úıiniń dırektory Raıhan Sahybekqyzy vıse-premer Imanǵalı Tasmaǵambetovti murajaı jumysymen jáne aqynnyń jádigerlerimen tanystyra otyryp, túıtkildi máselelerdiń bar ekenin jetkizdi. Vıse-premer óz kezeginde alash zııalylarynyń qundy muralaryn jınaqtap, saqtaýǵa kelgende aıanbaı eńbek etý qajet ekenin aıta otyra, osy dúnıelerdiń qundylyǵyna da erekshe toqtaldy. «1934-1937 jyldary aqyn turǵan osynaý kıeli shańyraq – tarıh pen taǵylymnyń ordasy. Bul úıdiń árbir kirpishi men buryshy Ahańnyń qıyn da qasiretti taǵdyrynan syr shertedi. Sondyqtan, biz bul tarıhı eskertkishti saqtaýǵa, onyń bilim men ǵylymnyń, tálim men tárbıeniń ordasy retinde damytýǵa tıispiz», – dedi I. Tasmaǵambetov.
Úkimet tarapynan qaıratkerdiń ǵylymı eńbekterin zerdeleýdi jetildirý maqsatynda Qazaqstan Respýblıkasy Premer-Mınıstriniń orynbasary Imanǵalı Tasmaǵambetov murajaıǵa ulttyq mártebesin berý, Ahmet Baıtursynuly shyǵarmalarynyń 10 tomdyǵyn shyǵarý jáne derekti fılm túsirý jóninde tapsyrma berdi. Qoıylǵan mindetterdi júzege asyrý úshin kelesi aptada Astanada arnaıy keńes ótkizilmek. Aıta keteıik, 1934-1937 jyldar aralyǵynda Ahmet Baıtursynov turǵan úı murajaı retinde 1998 jyly aqynnyń 125 jyldyq mereıtoıy qarsańynda resmı túrde ashylǵan. Sonymen qatar, bıyl Alash qozǵalysynyń qurylǵanyna 100 jyl tolady.
