«Barys» Mınskide «Dınamodan» jeńildi

Qurlyqtyq hokkeı lıgasynyń turaqty chempıonatynda Astananyń «Barysy» Mınskide «Dınamo» komandasymen kezdesip, 1:2 esebimen jeńildi. Oıynda alǵashqy gol 11-mınýtta soǵyldy. Aleksandr Pavlovıchtiń soqqysyna qonaqtar bóget ala almady. Osydan keıin de qos komanda alma kezek qaýipti shabýyldar uıymdastyrǵan. Alaıda, esep birinshi kezeńde ózgerissiz qaldy. Matchtyń negizgi goldary ekinshi 20 mınýtta soǵyldy. 34-mınýtta Nıkıta Mıskevıch mergendigimen tanylyp, esepti eseleı tústi. Araǵa 5 mınýt salyp, Brendon Bochenskı «Barystyń» alǵashqy ári sońǵy shaıbasyn soqty. Kezdesýdiń sońǵy bóliginde Edýard Zankoves shákirtteri qorǵanysta saq qımyldap, shabýylda saýatty oınady. Alaıda, oraıy kelgen sátter uıymdastyrylǵanmen, jerlesterimizdiń ýysynan sýsı berdi. Osymen 54 oıynnan 81 upaıy bar elordalyqtar «Shyǵys» konferensııasynda ázirge 5-orynda keledi. Kelesi kezdesýin 1 aqpan kúni Astanada Helsınkıdiń «Iokerıt» ujymymen ótkizedi. «Mınskiniń «Dınamosyn» jeńisimen quttyqtaımyn. Búgin jankúıerler jaqsy oıynǵa kýá boldy dep oılaımyn. Komandam bárin jospar boıynsha ótkizdi. Tablodaǵy esepti birneshe ret ózgertýimizge bolatyn edi. Alaıda, sáttilik bul joly bizdiń jaqta bolmady. Aıdyn ıeleri múmkindikterin tıimdi paıdalana bildi», – dedi Edýard Zankoves matchtan keıin uıymdastyrylǵan baspasóz konferensııasynda.