Qyzylorda oblysynyń ákimi Qyrymbek Kósherbaev bastaǵan delegasııa shekaralas óńirlermen yntymaqtastyq baılanys máselelerin talqylaý maqsatynda jumys saparymen О́zbekstan Respýblıkasynda boldy.
Jumys sapary О́zbekstan Respýblıkasynyń tuńǵysh Prezıdenti Islam Karımovtyń Samarqand qalasyndaǵy Shahı Zında kesenesindegi beıitine gúl shoqtaryn qoıýdan, sondaı-aq dańqty qolbasshy, jerlesimiz - Jalańtós Bahadúrdiń kesenesine táý etýden bastaldy. Delegattar birqatar kásiporyndardy aralap, kásipkerlermen jáne jergilikti kompanııa basshylarymen kelissózder júrgizdi.
Osydan soń Qyrymbek Kósherbaev Samarqand oblysynyń ákimi Hımmat Okbýtaevpen kezdesti. Kezdesý barysynda taraptar Qyzylorda jáne Samarqand oblystarynyń arasyndaǵy óndiristik jáne saýda-ekonomıkalyq yntymaqtastyqtyń perspektıvalaryn talqylady.
Al, Naýaı oblysyna sapar baǵdarlamasy Nuratadaǵy Áıteke bı memorıaldyq keshenine barýdan bastaldy. Onda qazaq mádenı ortalyǵynyń belsendilerimen kezdesý ótti.
Jumys sapary qyzylordalyq kásipkerler men Naýaı oblysy isker toptarynyń qatysýymen ótken bıznes-forýmmen jalǵasty. О́zbekstan tarapy qonaqtarǵa 2008 jyly qurylǵan «Naýaı» erkin ındýstrıaldy-ekonomıkalyq aımaǵynyń múmkindikterin tanystyrdy. «Naýaı» erkin ındýstrıaldy-ekonomıkalyq aımaǵynda salyqtyq, valıýtalyq jáne kedendik preferensııalardy qamtıtyn erekshe quqyqtyq rejım jumys isteıdi. Sonymen qatar aýmaqqa kólikpen kelip ketý, О́zbekstan Respýblıkasynyń turǵylyqty emes azamattary úshin eńbek etýge ruqsat berýdiń jeńildetilgen tártibi qarastyrylǵan. Budan bólek, «Naýaı» erkin ındýstrıaldy-ekonomıkalyq aımaǵyndaǵy kásiporyndar joǵary deńgeıli ınfraqurylymmen qamtamasyz etiledi.
Qyrymbek Kósherbaev pen Naýaı oblysynyń ákimi Kabýl Týrsýnov ónerkásip jáne aýyl sharýashylyǵy ónimderin qaıta óńdeý salalaryndaǵy ekijaqty yntymaqtastyqtyń perspektıvalaryn talqylady.
Sonymen qatar delegattar Tashkent qalasyndaǵy Tóle bı jáne Ámir Temir kesenelerine gúl shoqtaryn qoıdy. Qyrymbek Kósherbaev О́zbekstan Respýblıkasy Olıı Májilisi Senaty tóraǵasynyń orynbasary Sodık Safoevpen, sondaı-aq Tashkent qalasynyń ákimi Rahmonbek Ýsmanovpen, О́zbekstan astanasyndaǵy birqatar ónerkásiptik kásiporynnyń basshylarymen kezdesti. Bıznes ókilderimen kezdesý barysynda Qyrymbek Kósherbaev búginde memleketimiz Nursultan Ábishuly Nazarbaevtyń bastamasymen sheteldik ınvestorlarǵa jeńildikter preferensııalaryn usynyp otyrǵandyǵyn atap ótti.
- Olar – kedendik baj salyǵynan bosatý, memlekettik granttar usyný, salyq jáne ınvestısııalyq sýbsıdııa boıynsha jeńildikter berý. Al jergilikti bılik óz kezeginde óndiris oryndaryna jer telimderin bólý men qajetti ınfraqurylym júrgizýge kepildik beredi. О́z kezeginde biz agrónerkásip sektory, azyq-túlik, elektrotehnıka, qurylys jáne avtomobıl ónerkásibi salalary boıynsha О́zbekstan tájirıbesine súıengimiz keledi,- dedi Qyrymbek Kósherbaev.
Sapar qorytyndysy boıynsha qol jetkizilgen kelissózderdiń júzege asyrylýyn qamtamasyz etetin birlesken aımaqaralyq jumys toptary quryldy.
