О́skemen qalalyq Tótenshe jaǵdaılar qyzmetiniń mamandary erekshe reıd uıymdastyrdy. Ereksheligi sol, órt qaýipsizdigin durys saqtamaıtyn turǵyndardyń úıine ózderimen birge jyl ıesi - qorazdy ertip bardy. Qoraz kıimin kıgen órt sóndirý bóliminiń mamany áriptesterimen birge úı ıesine órt qaýipsizdigi erejelerin túsindirip, nusqaýlyqtardy tabys etti.
-Mundaı sharany bekerden beker qolǵa alyp otyrǵanymyz joq. О́rttiń saldarynan ómirimen qosh aıtysyp jatqan turǵyndar az emes. Iis gazynan ýlanatyn adamdardyń sany da kóp. 2017 jyldyń basynan beri О́skemende órt kezinde 3 adam qaıtys boldy. Turǵyn úılerdi arnaıy aralap, nusqaýlyqtardy taratyp, túsindirý jumystaryn barynsha júrgizip jatqanymyzben órt qaýipsizdigin saqtamaıtyn turǵyndar sany azaımaı otyr. Mundaı selqostyqtyń sońy qaıǵyly jaǵdaılarǵa ákelip soqtyrýy múmkin, - deıdi О́skemen qalalyq Tótenshe jaǵdaılar qyzmetiniń baspasóz hatshysy Marına Lıskova.
Azamat Qasym, «Egemen Qazaqstan».
О́skemen
