Abylaıhan Qusaıynov: Jekpe-jekte josparymdy tolyǵymen oryndadym

Qazaqstandyq boksshy Abylaıhan Qusaıynov (5-0, 4 KO) Kanadanyń Kvebek qalasynda jeńil salmaqta meksıkalyq Oskar Mehııamen (8-1-1, 3 KO) judyryqtasyp, tehnıkalyq nokaýtpen jeńiske jetken. Kezdesý Stıven Batler men Brendon Kýktyń anderkartynda ótti. Osy jeńisinen alǵan áseri jaıly óz oıymen bólisti. «Allaǵa myń da bir shúkir! Tartysty ótken kezdesýde qarsylasymdy tize búktirdim. Oskar Mehııamen kúsh synasatynym úsh apta buryn ǵana belgili boldy. Biraq barynsha daıyndalyp, jekpe-jekte oıǵa alǵanymnyń bárin júzege asyra aldym. Árıne, maǵan qaraǵanda tájirıbesi kóp sportshy bolǵandyqtan, ońaı boldy deı aılmaımyn», – deıdi Abylaıhan. Sports.kz aqpary boıynsha, ol 2017 jyly kóbirek jekpe-jek ótkizýdi maqsat etip otyr. «Jańa jyldan keıin birden jattyǵýǵa kirisip kettim. Daıyndyq kezinde birneshe sparrıng ótkizdik. Sharshy alańda qorǵanysta turyp qalmaı, shabýyldaǵandy jaqsy kóremin. Bul joly da bári oıdaǵydaı ótti .Búginge deıin bes kezdesý ótkizdim. Áli de bolsyn tájirıbe jınap, óz stılimdi tabýym kerek. Aldaǵy ýaqytta ózimniń jeke ádis-tásilderimmen bokstasamyn dep oılaımyn. Osy jeńisimniń arqasynda Boxrec reıtınginde 128 orynǵa kóterildim. Qazirgi basty mindetim – kórsetkishimdi joǵarylatý», – dedi boksshy.