OQO-da ımamdardy medrese-kolledjder daıyndaıdy

Ońtústik Qazaqstan oblysynyń ákimi Janseıit Túımebaev Qazaqstan musylmandary dinı basqarmasynyń tóraǵasy, bas múftı Erjan qajy Malǵajyulymen kezdesti. Júzdesý barysynda óńirdegi dinı ahýal men tatýlyq pen kelisim, rýhanı-ónegeli tárbıe berýdiń mańyzdy máseleleri talqylandy, dep habarlady OQO ákimdiginiń baspasóz qyzmeti. Sonymen qatar kezdesýde oblystaǵy dinı bilim berýdiń jaıy qozǵaldy. О́ńir basshysy ımamdyq korpýstyń joǵary bilikti kadrlaryn daıarlaý jáne óńirdegi teologııalyq bilim berý júıesin jetildirýde medrese-kolledjderdiń mańyzdylyǵyna toqtaldy. «Búginde oblysymyzda 800-ge jýyq meshit bar. Olarda qyzmet etip jatqan  ımamdardyń bilimi men biliktiligine asa mán bergen jón. Imam tek meshittiń ishinde ǵana jaýapty emes. Ol tutas bir ulttyń, mádenıettiń, rýhanııattyń aldynda jaýapty tulǵa. Sondyqtan aýyldy jerlerdegi meshitterdi bilikti dinı qyzmetkerlermen qamtamasyz etý qajet.  Eń bastysy - bul salaǵa meılinshe muqııat taldaý júrgizip, asa uqyptylyqpen jumys istegen abzal»,- dedi Janseıit Qanseıituly. Qazirgi tańda ımamdar daıarlaý isimen Shymkent pen Saryaǵashtaǵy medrese-kolledjder aınalysady. Atalǵan oqý oryndary ımamdardyń dinı tanymyn arttyryp, saıası jáne moraldyq turǵydan barynsha jetilýine kúsh salyp keledi. Bul maqsatqa 2016 jyly oblys bıýdjeti esebinen qarjy baǵyttalyp, 175 grant bólingen. «Búginde Ońtústik Qazaqstan oblysy ákimdigi dinı salaǵa asa qamqorlyqpen qoldaý bildirip otyr. Osynyń arqasynda eki medresemiz memlekettik lısenzııaǵa qol jetkizip, kolledj retinde tirkeldi. Osy jáne ózge de baǵyttaǵy birlesken jumystarymyz jemisti bolaryna senimdimin»,- dedi elimizdiń bas múftıi Erjan qajy Malǵajyuly. Sondaı-aq kezdesýde  ózge de jat aǵymdardyń  jumysyna taldaý jasap, úgit-nasıhat sharalarynyń aldyn alyp,  nazarda ustap otyrý máselesi de sóz boldy.