Onyń sózinshe, qarjy uıymdary qarajattyń bar bolǵanyna qaramastan ekonomıkany kredıtteýge asyqpaıdy jáne kóbine ótimdi, qaýipi tómen salalarǵa ınvestısııalaýdy jón kóredi. Nátıjesinde bir jyl ishinde kredıt kólemi 0,3%-ǵa tómendese, depozıt úlesi 10,7%-ǵa kóbeıgen.
«Alaıda ınflıasııa deńgeıi birtindep tómendese ári Ulttyq bank bazalyq mólsherlemeni azaıtatyn bolsa bankter kredıt naryǵyna qaıta oralady dep úmittenemiz. 2017 jyly bizdiń boljamymyz boıynsha kredıt ósimi ótken jylǵa qaraǵanda joǵary bolady», — dedi Táńirbergenova.
2017 jyldyń 1 qańtaryndaǵy aqparat boıynsha Qazaqstannyń bank sektorynda 33 oıynshy qaldy. Bank sektorynyń aktıvteri 25,5 trln teńgeni, kredıt somasy — 15,5 mlrd teńgeni, al depozıtter somasy — 17,2 trln teńgeni quraıdy. Aıta keteıik, 2016 jyldyń 26 jeltoqsanda Ulttyq bank Qazınvestbankti lısenzııasynan aıyrý týraly sheshim qabyldaǵan.
Sarapshynyń málimeti boıynsha, bir aıdyń ishinde Qazkommersbanktiń qaryz portfeli (aı saıyn -3,1%) azaısa, Kaspi Bank bir aı ishinde 3%-ǵa arttyrǵan.
«Bankter ózderiniń kredıt portfelderin arttyrýǵa asyǵady dep oılamaımyn. Sebebi olar negizgi qarajatyn aqsha-kredıt naryǵynda qaýiptiligi tómen ári ótimdi aktıvter boıynsha ustap otyrady. Alaıda jaǵdaı bazalyq mólsherleme tómendegen saıyn ózgerýi múmkin», — dedi sarapshy.
Dınara Táńirbergenovanyń sózinshe, jeltoqsan aıynda eń kóp depozıt ósimi Halyq bank (+12,6%) pen qazaqstandyq Sberbankte (+7,5%). Al depozıt kólemi azaıǵan bankter — Qazkommersbank (-19,5%) pen Eýrazııalyq bank (-5,9%).
«Qazkommers Sekıýrıtız» kompanııasynyń málimeti boıynsha, jyl basynan bergi depozıt ósimi 10,7%-dy qurady. 2016 jyldyń basynan bergi eń joǵarǵy ósim Halyq bank pen ATF Bankke tıesili (+27,2% jáe 33,7%). Sondaı-aq, Sesnabank 12 aı ishinde depozıt portfelin +14,8%-ǵa arttyrǵan. Al Qazkommersbankte kerisinshe, depozıtter bazasy 12,3%-ǵa tómendegen.
«Qazkommersbanktegi depozıt mólsheriniń azaıýy kvazımemlekettik sektoraǵy zańdy tulǵalardyń óz qarjylaryn alýymen baılanysty», — dep túsindirdi Dınara Táńirbergenova.
Sondaı-aq, sarapshy atap ótkendeı 2017 jylyń 1 qańtarynan bastap jeke tulǵalardyń salymdary boıynsha eń joǵarǵy tıimdi syıaqy mólsherlemesi ózgerdi. Endi syıaqy mólsherlemesi nomınaldy mólsherlemege emes, jyldyq tıimdi syıaqy mólsherlemege qatysty bolady.
Budan keıin ulttyq valıýtadaǵy standartty salym boıynsha nomınaldy syıaqy mólsherlemesi 13,2%-dy quraıdy. Bul — aı saıynǵy syıaqy kapıtalızasııasyn qosa eseptegendegi mólsherleme.
«Syıaqy mólsherlemesiniń tómendeýi teńgeniń devalvasııaǵa ushyraý yqtımaldyǵy men ınflıasııa deńgeıiniń tómendeýimen jáne valıýta naryǵyndaǵy ótimdiliktiń qalpyna kelýimen baılanysty. 2016 jyldyń qorytyndysy boıynsha, Qazaqstanda ınflıasııa 8,5%-dy qurady. Osy sebepti de mólsherlemeniń tómendeýi oryndy. Ulttyq bank 2017 jyly da ınflıasııa 6-8%-dy quraıdy dep otyr. Al eger osy ssenarıı júzege asatyn bolsa bankter de syıaqy mólsherlemesin birtindep tómendete beredi. Qazirdiń ózinde keıbir bankter stavkany tómendete bastady», — dedi «Kazkommers Sekıýrıtız» sarapshysy.
Sarapshy atap ótkendeı 2016 jyldyń basynan beri bank sektoryndaǵy qaryz portfeliniń sapasy birshama jaqsarǵan.
Merzimi 90 kúnnen asyp ketken kredıtterdiń úlesi jeltoqsan aıynda 7,3%-dan 6,7%-ǵa deıin tómendegen. Problemalyq kredıti eń kóp bankter — ATF Bank (12,1%), Qazaqstannyń Sberbanki (9,2%) jáne Bank SentrKredıt (8,9%). Al Sesnabank pen Qazkommersbankte kerisinshe, problemaly kredıtter deńgeıi tómen.
Sondaı-aq, ótken jyly bankterdiń kiristilik nátıjesi de jaqsy bolǵan. Eń joǵarǵy kiris Kazkommersbank (24,1%) pen Halyq bankke (22,7%) tıesili.
