Jambyl oblysynda joǵary tehnologııalyq hımııalyq zaýyt salynady

Jambyl oblysynda sapaly hımııalyq ónim óndiriletin bolady, dep habarlady óńir ákimdigi. «Taraz» hımııalyq parki» arnaıy ekonomıkalyq aımaǵy elimizdiń jańa ekonomıkalyq saıasaty baǵdarlamasyna endi. AEA aýmaǵynda jalpy jyldyq qýattylyǵy 2 mln tonnadan astam daıyn ónimdi quraıtyn 16 joǵary tehnologııalyq hımııalyq zaýyt salynatyn bolady. Atalǵan joba aıasynda 2 myńǵa jýyq jumys orny ashylatyn bolady. «AEA-da sapaly hımııalyq ónim óndirý josparlanyp otyr. Kúıdirgish soda, hlor, glıfosat, ammıak, polıetılen, pestısıdter, sýtek totyǵy jáne basqalary óndiriletin bolady. Bul hımııalyq ónimder respýblıkamyzda shyǵarylmaıdy nemese az mólsherde shyǵarylady», - dep atap ótti ákimdik ókilderi. Joba boıynsha konsýltant retinde álem boıynsha 140-tan astam jobany sátti iske asyrǵan belgili Jurong Sıngapýr konsaltıngtik kompanııasy tańdalǵan. Búgingi tańda «Taraz» hımııalyq parki» AEA-da bes qatysýshy tirkelgen. Olardyń arasynda «Hım-Plıýs», «Gadamindustries», «Central Asia Chemical», «Inter-marketing» jaýapkershiligi shekteýli seriktestikteri jáne «Nıka» óndiristik kompanııasy bar. Jobalar boıynsha ınvestısııalardyń jalpy kólemi 27 mlrd teńgeden astam. Bolashaq óndiristerdiń aınalasynda 100-den astam ShOB sýbektileri paıda bolady dep boljanýda. AEA-ny iske qosý kezeń-kezeńmen júrgiziledi. Alǵashqy zaýyttyń iske qosylýy 2018 jylǵa josparlanǵan.