Nursultan Nazarbaev: Memlekettiń ekonomıkaǵa qatysyn azaıtýymyz kerek

Búgingi arnaıy málimdemesinde Memleket basshysy jańa ekonomıkalyq saıasat pen saıası reformalardyń bir-birin tolyqtyratynyn aıtty. «Bıznes-ortany keńeıtý jáne buqaralyq kásipkerlikke qajet jaǵdaıdy jaqsartý asa mańyzdy. Ol úshin memlekettiń ekonomıkaǵa qatysýyn azaıtý kerek. Damýdyń kelesi úlgisindegi býyndardyń biri – agroónerkásip kesheni, kólik jáne logıstıka. Turǵyn-úı rynogyn damytý, memlekettik qoldaý sharttary jaıly óz aldyna bólek aıtylatyn bolady. Makroekonomıkalyq saıasat da jetildirýdi qajet etedi. Úkimetke «Úshinshi jańǵyrý» boıynsha 2025 jylǵa deıingi damýdyń strategııalyq josparyn jasaý tapsyrylady. Ol «Qazaqstannyń Ulttyq tehnologııalyq bastamasy» dep atalady jáne qazirgi zamannyń qaterlerine jaýabymyz bolady. Úkimettiń aldyna mańyzdy maqsat-mindetter qoıylady. Olardy oryndaýǵa qajetti resýrstar men múmkindikterdiń bári bizde bar. Osynyń barlyǵy uzaq merzimdi prespektıvada ekonomıkany turaqty damytýǵa jaǵdaı jasaıtyn bolady. Jaqynda memleketti saıası jańǵyrý jobasy jarııalandy. Bul eki bastama bir-birin tolyqtyryp, eldiń uzaq merzimdi damýyn qamtamasyz etedi» dedi Memleket basshysy. "Osy arqyly biz Strategııa-2050-diń negizgi maqsatyna qol jetkizip, álemniń eń damyǵan otyz eliniń qataryna kire alamyz. Qazaqstannyń tehnologııalyq jańǵyrýy týraly basym baǵyttar osyndaı. Bolashaq damý men memlekettiń gúldenýine baǵyttalǵan bul joldy Qazaqstan halqy qoldaıdy dep senemin. Aldaǵy úlken jumysymyzda barlyǵymyzǵa sáttilik tileımin", dep aıaqtady sózin Nursultan Nazarbaev.