Abaılańyz, jon arqańdy «kózdep» tur

Keıde «qolymnyń suǵanaq­tyǵy bar» dep qaljyńdaımyz. Oǵan shynymen senip qalatyndar da az emes. Degenmen, qolymyzda ustap turǵan qalamsapty qaltaǵa salyp, emin-erkin ketip qalatyn ádetimiz bar. Ásili, bul kásibı ádet bolsa kerek. О́ıtkeni, jazý-syzýǵa beıim jurttyń kópshiligi ózgeniń qalamsabyn baıqamaı alyp kete beredi. Osyny meńzep álgi ázildi aıtamyz ǵoı. Al siz jańa jyldyq shyrshany bezen­dirgen oıynshyqtardy urlaǵan adamdy kórdińiz be? Biz kórdik. Osydan birneshe kún buryn jarym túnde áldebir azamat Qyzylorda qalasynyń ortalyq alańynda ornalasqan shyrshadan oıynshyq urlaǵan. Ony qalalyq ishki ister basqarmasynyń jedel basqarý ortalyǵynyń kezek­shi-ınspektory beınekamera arqyly baıqap qoıǵan. О́zine belgilengen aýmaqty sholý ba­rysynda ortalyq alań­da ornalasqan shyrshanyń oıyn­shyqtaryn urlap, jeke avto­kóligine minip, oqıǵa ornynan izin sýytpaq bolǵan azamatty birden baıqaǵan ınspektor birden jaǵymsyz jaǵdaı týraly habar­laıdy. Oqıǵa ornyna dereý polısııa jasaǵy jiberilip, nátıjesinde 1982 jyly týǵan qala turǵyny ustaldy. Búginde atalǵan derek boıynsha sotqa deıingi tergep-tekserý amaldary júrgizilip jatyr. Bul ne endi? Keıingi kezderi urlyq-qarlyqtyń kóbeıgeni jaıynda kóp aıtylady. Temir tulpardyń tórt dóńgelegin kóterip ketkender, úıinde malyn aıdyń-kúnniń amanynda urlatyp alǵan jaǵdaılar, páterinen baǵaly zattardy jymqyrtyp alǵandar týrasynda ár jerden estımiz. Al shyrshadaǵy oıyn­shyqtardy urlaǵan urlyqshy haqynda birinshi ret estip otyrmyz. Álde bul erikken adamnyń tirligi me? Osy arada myna jaǵdaıdy aıtqan abzal shyǵar. Jalpy, Qyzylorda oblysy ortalyǵynda quqyq buzýshylyqtar men qylmystardyń aldyn alý, oryn alǵan urlyq qylmystaryn der kezinde ashý men jol qozǵa­lysy erejesin buzǵandardy anyqtaý maqsatynda adam kóp shoǵyrlanatyn oryndarǵa beı­nebaqylaý kameralary ornatylyp, zań buzýshylyqtardy anyqtaýda septigin tıgizip ke­ledi. Qalada 272 beınekamera bar bolsa, olardyń barlyǵy Qyzylorda QIIB-niń Jedel basqarý ortalyǵyna qosylǵan. Jyl basynan beri atalǵan beınekameralardyń kómegimen 8 qylmystyń beti ashylyp, 1606 ákimshilik quqyq buzýshylyq anyqtalǵan. Sondyqtan zań buzýshylyqqa baratyn adam jon arqasynan «kózdiń» qadalyp turǵanyn bilýi kerek. Erjan BAITILES, «Egemen Qazaqstan» QYZYLORDA