Tártip kúsheıip, senim artty

Astana qalasy Ishki ister depar­ta­menti­nde Ishki ister mınıstri, polısııa general-leıtenanty Qalmuhanbet Qasymovtyń, Astana qalasynyń ákimi Áset Isekeshevtiń qatysýymen jedel ke­ńes ótti. Jıynda elordalyq ishki ister depar­ta­­mentiniń 2016 jyly atqarǵan jumys nátıjeleri men onyń alda turǵan qyzmet jospary talqylandy. Osyǵan oraı sóz sóılegen IID bastyǵy, polısııa general-maıory Amantaı Áýbákirov ótken jyldyń jedel-qyzmettik jumysynyń qorytyndysyn baıandaı otyryp, jalpy jaǵdaı turaqty ekendigin jetkizdi. Júrgizilgen is-sharalar nátıjesinde aýyr, asa aýyr, sonymen qatar, orta jáne jeńil sanattaǵy qylmystardyń sa­ny azaıǵanyn atap ótti. Qoǵamda tolqý tý­ǵyz­ǵan aty-shýly qylmystardyń barlyǵy ashylǵan. Osylaısha, elordalyq polısııa Memleket basshysynyń tapsyrmalaryna sáıkes halyqtyń polısııaǵa senimin arttyrýda, qyzmet ashyqtyǵyn qamtamasyz etý men zań buzýshylyqtardyń aldyn alýda júktelgen mindetterdi oryndap keledi. Memleket basshysynyń tapsyrmasyn oryndaý jáne halyqtyń senimin arttyrý maqsatynda Jedel basqarý ortalyǵynyń 102 pýltine qońyraý shalatyn adamdar­men habarlasyp otyrý tájirıbege engizildi. 2016 jyldan bastaý alǵan mun­daı tájirıbe oń nátıjesin berip, endi ol odan ári jalǵasa beredi. Sol sııaqty, bes ınstıtýttyq reformany iske asyrý boıyn­sha Memleket basshysynyń tapsyrmalaryna saı qyzmetine ótken jyldyń basynda kirisken jergilikti polısııaǵa erekshe den qoıylady. Bul oraıda Astana qalasy Ishki ister departamenti jumysynyń ótken jylǵy jedel qyzmeti týraly aqparatty tyńdaǵan Ishki ister mınıstri Qalmuhanbet Qasymov «100 naqty qadam» Ult josparyn oryndaý barysynda elimizdiń bas qalasynda tártiptik jaǵdaıdy turaqty qamtamasyz etý kerektigin aıtty. Sonymen qatar, jedel-qyzmettik jumysty jaqsartý qajettiligi, urlyqty ashý jáne boldyrmaý, qylmys týraly barlyq aryzdar men habarlamalarǵa jedel den qoıý, jeke quram arasynda tártip pen zańdylyqty saqtaý qajettigi atap kórsetildi. Jıyndy qorytyndylaǵan Astana qala­synyń ákimi Áset Isekeshev el­ordalyq polısııa men jergilikti at­qarýshy organdardyń qarym-qatynasy mánine toqtaldy. Astana qalasy jyldan jylǵa damyp, sáıkesinshe astana­lyq polısııa qyzmeti de barǵan saıyn jetildirilýde. Qazirgi tańda munda «smart-tehnologııa» baǵytyndaǵy eń ozyq tehnologııalar qoldanylýda. Astana kóshelerinde zamanaýı beınekameralar ornatylǵan jáne olar­dyń sany artýda. Demek, mindetin tala­p­qa saı atqarýda polısııa úshin bar­lyq jaǵdaı jasalǵan. Osyǵan oraı Á. Isekeshev jergilikti polısııa qyzmetine qoǵamdyq oryndar men qala kóshelerinde jasalatyn quqyq buzýshylyqtardyń aldyn alyp, naqty tártiptiń ornyǵýy men basymdy is-sharalar atqarylýy qajettigin tapsyrdy. О́ıtkeni, bıyl elordalyq polısııa aldyna EKSPO-2017 halyqaralyq kórmesin ótkizýde qaýipsizdik pen tynyshtyqty saqtaýda erekshe mindet qoıylyp otyr. Aleksandr TASBOLATOV, «Egemen Qazaqstan»