Aqpanda baspana arzandaı ma?

Bıylǵy aqpanda jyljymaıtyn múlik naryǵynda sál-pál ózgerister bolady. Qaıtalama naryqta 2017 jylǵa arnalǵan boljam boıynsha, baǵa 7-10 paıyzǵa tómendeıdi, al jańa baspanalar naryǵy ázirshe baǵany osy deńgeıinde ustap turady, - dep habarlaıdy Tengrinews.kz. Mundaı pikirdi jyljymaıtyn múlik satyp alýshylarǵa arnalǵan Homsters.kz halyqaralyq onlaın-servısiniń basqarýshy seriktesi Marııa Ren aıtyp otyr. "2017 jylǵa arnalǵan boljamymyz - qaıtalama naryqta baǵa 7-10 paıyzǵa tómendeıdi. Biz bul boljamdy áli de rastaımyz, sondyqtan aqpan aıynda "eski" baspana qunynyń 0,2-0,3 paıyz shamasynda sál-pál tómendeýi tirkeledi dep kútemiz. Naryqtyń jandanýy, bizdińshe, aqpannyń ekinshi jartysynda jáne naýryzda bolady, biraq bul aralyqta da baǵa aıtarlyqtaı tómendeıdi deı almaımyz. Kerisinshe, naryqqa jan bitip, satyp alýshylardan suranys bola bastaǵanda, baǵa sol deńgeıinde turaqtala berýi múmkin", - dep boljady maman redaksııanyń resmı saýalyna bergen jaýabynda. Aıtýynsha, budan shyǵatyn qorytyndy: baǵanyń aıtarlyqtaı tómendeýin kútip, baspana satyp alýdy uzaq ýaqytqa keıinge qaldyrý jón bola qoımas. "Ekonomıkadaǵy ahýal turaqtalyp keledi, teńge qalpynda, halyqaralyq sarapshylar osy jyldan bastap, ishki jalpy ónim ósimi qaıta baıqalatynyn boljap otyr. Bul oraıda baǵanyń edáýir, onyń ústine, jyldam tómendemeıtini anyq. Al qaıtalama naryqta aqsha tóleýge daıyn satyp alýshylar baspana satýshylarǵa qaraǵanda az", - deı kele maman mundaı jaǵdaıda tabandy satyp alýshynyń naryqta baǵanyń tómendeýin kútkennen góri satýshymen biraz saýdalasýǵa jáne odan jaqsy jeńildik alýǵa múmkindigi kóp ekenin aıtyp ótti. Jańa baspanalar naryǵy bolsa, boljamǵa qaraǵanda, ázirshe baǵany osy deńgeıinde ustap turady. "Munyń sebebi - arzandatýdyń birneshe kezeńinen soń úı salýshylardyń kóbi "qurylystyń ózindik quny + ustalǵan shyǵyndar" deńgeıinen alys kete almaı jumys istep jatqandyqtan, bul segmentte baǵany tómendetýge múmkindik beretin sharttar qalmady", - dep túsindirdi ol. Sonymen birge, qaıtalama naryqtaǵy baspanalar sapasynyń tómendigine baılanysty satyp alýshylar jańa úılerdi jıi tańdaıtyn bolǵan, osyǵan baılanysty bul da baǵanyń tómendemeýine yqpal etedi deıdi Marııa Ren.