Reseılik tanymal ánshi Vıtastyń prodıýseri Qytaı telearnasyna hat jazyp, Dımash Qudaıbergenov oryndaǵan «Opera 2» áni úshin narazylyq bildirdi. Bul týraly Qytaıdyń áleýmettik jelileri jazyp jatyr, dep habarlaıdy
QazAqparat.
Vıtastyń prodıýseri Sergeı Pýdovkınniń «Vıbo» (qytaılyq tvıtter) áleýmettik jelisindegi paraqshasynda «Pýdovkın» prodıýserlik ortalyǵynyń Hýnan telearnasyna jazǵan hatyn jarııalady. Onda atalmysh telearnanyń avtorlyq quqyq zańnamalaryn saqtamaǵandyǵy aıtylǵan.
«Opera 2» - reseılik tanymal ánshi Vıtalıı Gogýnskııdiń avtorlyq áni. Áýeni de, sózi de Vıtasqa tıesili. Ol 2000 jyly bul ándi tuńǵysh ret oryndap, tanymal boldy. Vıtastyń barlyq ánderiniń quqyǵy «Pýdovkın» prodıýserlik ortalyǵynyń menshiginde. Hýnan telearnasy uıymdastyrǵan «Singer2017» án baıqaýynda qazaqstandyq ánshi Dımash Qudaıbergenov 28 qańtar kúni «Opera 2» ánin oryndap, bul telearna arqyly keńinen taraldy. Budan bólek (Dımashtyń áni) ár túrli saıttarda keńinen júktelip, paıdalanylýda. Sonymen birge 30 qańtar kúni bul án «búkil álemdik Qytaıdyń kóktem merekesinde» taǵy oryndalyp, telearna, ınternet arqyly taǵy taraldy.
Vıtas ánderi álemniń kóp elderinde taralǵanymen paıdalanýda jergilikti organdar arqyly zańdyq quqyq qorǵalady. Bul joly Hýnan telearnasy «Pýdovkın» prodıýserlik ortalyǵynyń zańdyq múddesine zalal keltirdi», delingen hatta. Sonymen birge Vıtastyń prodıýserlik ortalyǵy atalmysh telearnaǵa mynadaı talaptaryn joldaǵan:
1. Hatty alǵan soń, 30 qańtar kúni «búkil álemdik Qytaıdyń kóktem merekesinde» aıtylǵan «Opera 2» ániniń taralýyn toqtatý.
2. Zańdy jolmen ruqsat alynbaǵan jaǵdaıda «Opera 2» ánin aıtýǵa, paıdalanýǵa bolmaıdy.
3. Osy hatty alǵannan soń, 7 kún ishinde bizben habarlasyp, ortaq sheshimge kelý. Hat sońynda «Pýdovkın» prodıýserlik ortalyǵynyń Hýnan telearnasymen kelisimshart jasaýǵa daıyn ekendigi aıtylǵan.
