Qazaqsha sóılep, qobyz tartýdy armandaıdy

Muhıttyń arǵy jaǵyndaǵy alyp derjava turǵyndarynyń Qazaqstannyń ulttyq erekshelikterin, tarıhı, rýhanı qundylyqtaryn bilýge qushtarlyǵy S.Muqanov atyndaǵy oblystyq ámbebap kitaphanada amerıkalyq aqparattyq-mádenı bólimniń ashylýy kezinde taǵy bir baıqaldy. Onyń saltanatty ashylý rásimine arnaıy kelgen Amerıka Qurama Shtattarynyń Qazaqstandaǵy elshiliginiń baspasóz hatshysy Ren Elhaıdyń sóz aýanynan da ańǵardyq. Bizdi bul myrzanyń qazaq tilin úırenýge, qobyz tartýǵa den qoıǵan ynta-jigeri súısindirdi. AQSh elshiligi soltústik­qazaqstandyq jastardy shetel mádenıetimen tanystyrý, aǵylshynsha alǵan bilimderin odan ári tereńdetý dástúrin júıeli jalǵastyryp keledi. Osydan on jyl buryn sheteldik kitaptar men oqýlyqtar ortalyǵy boı kótergen bolatyn. Alaıda, qarjy tap­shylyǵynan ýaqyt­sha ja­bylǵan edi. Jań­ǵyrtý jumystary shy­ǵyndaryn elshilik óz mindetine alyp, 14 myń dollar ınvestısııa jumsady. Bul qarajatqa kitaphananyń birinshi qabatynda ornalas­qan ǵımarat qalpyna keltirilip, kirse shyq­­qysyz etip be­zendirildi. Jańa jıhazdar men kom­pıýterler qoıyldy. Qazir munda on myńǵa jýyq kitap bar. Onyń eki myńdaıy – aǵylshyn tilinde. – Osyndaı mádenı qarym-qatynastar ar­qyly ózge halyqtyń tilin úırenýge, salt-dás­túrler men ádet-ǵu­ryp­tar týraly mol maǵ­lu­mattar alýǵa bolady. Til úıirmeleri men pikirtalas klýbtary jumys isteıdi. Aldaǵy ýaqytta Amerıkadan oqytýshylar arnaıy kelip, aǵylshyn tilin úıretedi. Oqý tegin. Onlaın sabaq ótkizý arqyly sóıleý mádenıetin jetildirýge de bolady. Bizdi qazaq­standyq jastardyń bil­sem, kórsem, úırensem degen qush­tarlyǵy qat­ty qy­zyqtyrady, – deıdi Elhaı myrza. «BEST» gımnazııa­synyń oqýshysy Vlada Fı­nogeevany osynda jo­lyq­tyrdyq. Turaqty oqyr­man kórinedi. «Flex» baǵdar­lamasy aıasynda Aıova shtatynda bilimin shyńdap kelipti. – Amerıkalyqtardyń ómirge kózqarastary men us­ta­nymdarynda úlgi alar­lyq taǵylymdar az emes. Eki jaqty se­nimdi baılanysqa ne jetsin! Armanym–shet­elde bilim alý, – deıdi ol. Amerıkalyq ma­mandar atalmysh ki­taphana qabyr­ǵasynda jastardyń tildik bilimin tekserýge arnalǵan alǵash­qy saıysty aqpan aıyn­da uıymdastyrǵaly otyr. Buryndary bul orta­lyqqa aıyna jarty myń­daı oqyrman kelse, endi olardyń sanynyń arta túserine esh kúmán joq. О́mir ESQALI, «Egemen Qazaqstan» Soltústik Qazaqstan oblysy