Kásipkerlerge jeńildik kóp

Keshe Astana qalasy ákimi Áset Isekeshev pen «Atameken» ulttyq kásipkerler palatasynyń tóralqa tóraǵasy Tımýr Qulybaevtyń qatysýymen kásipkerler konferensııasy ótti. Alqaly jıynda elordadaǵy kásipkerlikti damytýdyń negizgi basymdyqtary talqylandy. Sonymen qatar, Astana naryǵyna aýylsharýashylyq ónimderin tikeleı jetkizý múmkindikteri, bıznes-ortany jetildirý týraly jan-jaqty sóz qozǵaldy. Sharada «Atameken» UKP basqarma tóraǵasynyń orynbasarlary Nurjan Áltaevtyń, Tólemis Shotanovtyń jáne Astana qalasy kásipkerler palatasynyń dırektory Ǵanı Tasmaǵanbetovtiń baıandamalary tyńdaldy. Olar elordada bıznestiń barlyq salasyn damytýǵa qatysty usynys­taryn jetkizip, qazirgi ahýaldy áńgimeledi. Turǵyn úıge arnal­maǵan orynjaılardyń fýnk­sııalyq qyzmeti boıynsha zań­nama talaptary, adal salyq tó­leýshilerdi QQS bo­ıyn­sha tirkeý esebinen eskertýsiz júıe­li túrde shyǵarý, energetıka, kólik jáne logıstıka, sondaı-aq, turǵyn úı-kommýnaldyq sharýa­shylyq salalaryndaǵy qyz­met kórsetý qunyn jappaı azaı­tý máselelerin ortaǵa salyp, keńinen túsindirdi. Jıyn barysynda Astana ákimi bıyl ótetin EKSPO kórmesi kezinde qonaqtardy azyq-túlikpen qamtamasyz etý máselesine toqtaldy. «Qazirgi ýaqytta biz «Atameken» ulttyq kásipkerler palatasymen jumys isteýdemiz. Astanalyqtar jyl saıyn 500 myń tonna azyq-túlik ónimderin tutynsa, jazda bul kólem 160 myń tonnany quraıdy degen boljam bar. Demek, 10-20 paıyzǵa ósim bolady», dedi Á.Isekeshev. Qala basshysynyń sózine qaraǵanda, búginde birqatar azyq-túlik ónimderi boıynsha tapshylyq baıqalady. Al EKSPO kezinde baǵanyń turaq­tylyǵyn qamtamasyz etý úshin kóterme taratýshy ortalyqtaryn ashý josparlanǵan. Aýylsha­rýa­shylyq ónimin óndirýshiler sol jerge óz taýarlaryn jetkizip, tıimdi baǵamen sata alady. Sonymen qatar, Áset Ise­keshev azyq-túlik dúkenderi men dárihanalar az jerlerde bız­nes ashýǵa nıet tanytqan kásip­ker­lerge jeńildik jasaýǵa daıyn ekendikterin jetkizdi. Ashat RAIQUL, «Egemen Qazaqstan»