Birlik pen tirlik úılesimdiligi

Jyl úlken saıası jańalyqtarmen bastalǵan edi. Táýelsizdiktiń alǵashqy jyldarynda Elbasy «aldymen – ekonomıka, sosyn saıasat» degenin kóp jurt túsinbeı, ártúrli áńgime aıtylyp edi. El ekonomıkasynyń eńsesin túzeý úshin kúshti prezıdenttik bıliktiń keregi anyq bolatyn. Mine, shırek ǵasyr ishinde bul mindet oryndaldy. Endi bılik tarmaqtaryndaǵy bóliniske de ýaqyt jetti. Memleket basshysy arnaıy Úndeý jarııalap, halyq ony talqylaýdy bastap ketti. Onan keıingi eń iri saıası oqıǵa Elbasynyń dástúrli halyqqa arnaǵan Joldaýy bolatyn. Bul másele de el ishinde úlken qoldaý taýyp otyr. Ártúrli minbelerde qos másele talqy­lanyp, jurt oıymen bólisip jatyr. Sondaı jıynnyń biri aımaqtaǵy oblystyq úsh, qalalyq jáne aýdandyq gazetterdiń basyn biriktirip otyrǵan «Syr medıa» JShS ujymynda da ótti. Elbasy Nursultan Nazarbaevtyń bılik tarmaqtary ókilettiligin bólisý týraly Úndeýi men «Qa­zaq­stannyń Úshinshi jańǵyrýy: jahan­dyq básekege qabilettilik» atty Qazaqstan halqyna Jol­daýyn talqylaýǵa arnalǵan jıyn­da qalam ustaǵan jýrnalıs­ter óz kózqarastarymen bólisti. Oǵan oblystyq ishki saıasat bas­qar­masynyń ókilderi, seriktes­tikke qarasty basylym basshylary men jýrnalıster, qatysty. Jıyndy «Syr medıa» JShS bas dırektory Amanjol Ońǵarbaev júrgizip, Joldaýdyń el bolashaǵy úshin mańyzyn atap ótti. – Halyq «Birlik bar jerde tirlik bar» deıdi. Elbasymyzdyń elimizdi jaýapkershilikke shaqyra otyryp, kóterip otyrǵan bastamasy Qazaqstandy jańa bıikterge bastaıdy dep senemiz. Bizdiń mindet – Elbasy Joldaýyn qol­daý ǵana emes, júzege asyrý, – dedi ol. Munan soń «Syr medıa» JShS ja­nyn­daǵy aq­parattyq taldaý orta­ly­ǵy­nyń basshysy Sáýlet Sahıev bıylǵy Jol­daýdyń basty erekshelikterine, onyń ishinde IT tehnologııa­lardy meń­gerý­diń mańyzdylyǵy jaıly basa aıtty. Jıynda oblystyq ishki saıasat bas­qarmasynyń bólim basshysy Shaharban Nur­taeva, seriktestik bas dırek­torynyń birinshi oryn­basary Marat Aral­baev, oblystyq «Kyzylor­dınskıe vestı» gazetiniń bas redaktory Tımýr Qasymov, osy basylym tilshisi Qazybek Botaev pen «Syr boıy» gazetiniń aǵa tilshisi Ydyrys Tájiuly Jol­daýda aıtylǵan baǵyttarǵa toqtalyp, el damýyndaǵy jańa belestiń negizgi mán-mazmunyn sóz etti. Erjan BAITILES, «Egemen Qazaqstan» QYZYLORDA