Adamı kapıtal – negizgi basymdyq

Atalmysh oqý ornynyń rektory Aıman Musaqojaeva Elbasynyń jýyrda ǵana Qazaqstan halqyna arnaǵan Joldaýynyń basymdyqtaryn stýdentter qaýymyna keńinen túsindirip, negizgi basymdyqtardy qaıtadan oı eleginen ótkizdi. Bıylǵy Joldaýdaǵy negizgi alty basymdyqtyń biri – adamı kapıtal sapasyn jaqsartý ekeni belgili. Munda, eń aldymen, bilim berý júıesiniń róli ózgerýge tıis ekendigi aıtylǵan. Osyǵan baılanys­ty oqytý baǵdarlamalaryn synı oılaý qabiletin jáne óz betimen izdený daǵdylaryn damytýǵa baǵyttaý qajettigi kórsetilgen. Qazaq, orys, aǵylshyn tilderin oqýǵa kezeń-kezeńmen kóshý máselesi boıynsha Úkimetke usynystar ázirleý qajettigi baıandalǵan. «2019 jyldan bastap 10-11 synyptarda keıbir pánderdi aǵylshyn tilinde oqytatyn bolamyz. Bul máseleni tııanaqty oılanyp, aqylmen sheshý qajet» – delingen Joldaýda. Aıman Musaqojaeva osy máse­le­lerge qatysty óz kózqarasyn tómen­degishe bildirdi: – Elbasy Joldaýynda úsh tildi meńgerý týraly aıtylǵan. Árıne, biz, eń aldymen, óz ana tilimizge basymdyq berýimiz qajet. Al, aǵylshyn tilin úırený – qazirgi ýaqyttyń talaby. Ásirese, biz, shet elderde ótetin baıqaýlarǵa, festıvaldarǵa qatysyp jatamyz. Sol elderdegi mýzyka mamandarymen qarym-qatynas jasaý úshin, suhbat berý úshin biz aǵylshyn tilin úırenýimiz kerek. Qarapaıym ǵana bir mysal, kóptegen baıqaýlardyń jeńimpazy atanǵan nebir talantty balalardyń ózi aǵylshyn tilin bilmegeni sebepti magıstratýraǵa da túse almaı qalyp jatady. Sol úshin biz bul máselege jaı qaramaýymyz kerek. Kelesi kezekte sóz alǵan Memleket jáne qoǵam qaıratkeri, ǵalym, ýnıversıtettegi Qorqyt ata atyndaǵy ǵylymı-zertteý ınstıtýtynyń dırektory Myrzataı Joldasbekov elimiz táýelsizdik alǵannan bergi jyldarda jasalǵan Joldaýlar jaıly aıta kelip, bul jolǵy qujattyń ereksheligi – Úshinshi jańǵyrýdy maqsat etýinde dedi. Aldyńǵy eki jańǵyrýǵa da toqtalyp ótti. Belgili ǵalym elimizdiń birinshi jańǵyrýy álem kartasynda bolmaǵan jańa memlekettiń qurylýymen baılanysty degen Elbasy sózin keltirdi. Sondaı-aq, ekinshi jańǵyrý «Qazaqstan-2030» strategııasynyń qabyldanýymen, Astananyń salynýymen bastalǵanyn aıtty. «Elimiz Úshinshi jańǵyrýǵa qadam basyp otyr. Úshinshi jańǵyrý qalaı iske asyrylady. Konstıtýsııaǵa reforma jasaý arqyly biz kóp nárseni ózgertemiz. Qarap otyrsam, 1995 jyly Ata Zańymyz qabyldanǵaly beri osy ýaqytqa deıin oǵan 59 ret ózgeris engizildi. Osy joly Konstıtýsııaǵa 18 ózgeris engizilmek. Sondaı-aq, Elbasy 40-qa jýyq ókilettigin ókiletti atqarýshy organdarǵa bermek. Bul arqyly olarǵa úlken jaýapkershilik júkteledi» – dedi M.Joldasbekov. Jalpy, ýnıversıtettegi Jol­daý­dy talqylaýǵa arnalǵan jıyn óz deńgeıinde ótti. Talqylaý, pikir aıtýdan ýnıversıtet oqytýshylary men stýdentter de syrt qalmady. Olar da Joldaýdaǵy naqty bilim-ǵylymǵa qatysty tórtinshi basymdyqtyń erekshelikteri, mán-mańyzy týraly óz oılaryn ortaǵa saldy. Aıgúl SEIILOVA, «Egemen Qazaqstan»