Janattyń jeńisinen keıin Qazaqstan úzdik bestikke kirdi

Qazaqstandyq Janat Jaqııanov (27-1, 18 KO) jeńil salmaqta WBA (Super) jáne IBO tujyrymdary boıynsha álem chempıony atanǵannan keıin Qazaqstan kásipqoı boksta chempıondyq tıtýldary bar úzdik bes eldiń qataryna kirdi. Bul týraly vesti.kz habarlady. Birneshe kún buryn Jaqııanov AQSh-tyń Ogaıo shtatyndaǵy Toledo qalasynda amerıkalyq Roýshı Ýorrenmen (14-2, 4 KO) judyryqtasyp, tóreshilerdiń sheshimimen jeńiske jetken bolatyn. Osydan keıin ol eki birdeı belbeýdiń ıegeri atandy. Janattyń jeńisiniń arqasynda Qazaqstannyń da kórsetkishi jaqsardy. Endi jerlesterimizdiń enshisinde tórt chempıondyq belbeý bar. Onyń úsheýi orta salmaqta judyryqtasatyn Gennadıı Golovkınge tıesili (WBA (Super), WBC jáne IBF). Sondaı-aq, ekýinde de IBO tıtýldary bar. Biraq ol asa mańyzdy bolyp eseptelmeıdi. Osy kórsetkish boıynsha Qazaqstan besinshi orynǵa Fılıppın elimen birge ornalasty. Bul tizimdi AQSh (12 tıtýl) bastap keledi. Ekinshi orynda – Ulybrıtanııa (9), úshtikti Japonııa (8) túıindep tur. Tórtinshi orynǵa Meksıka (7) turaqtady. Sonymen qatar, Janat elimizdiń qazirgi chempıon boksshylarynyń da statıstıkasyn jańartýyna septigin tıgizdi. Eki chempıony bar (Golovkın men Jaqııanov) Qazaqstan altynshy orynǵa kóterildi. Mundaı kórsetkishke Reseı, Kýba, Taıland jáne Ýkraına elderi de ıe. Bul tizimde birinshi orynda taǵy da AQSh (12) keledi. Ekinshi – Ulybrıtanııa (9), úshinshi – Japonııa (8), tórtinshi – Meksıka (7), besinshi – Fılıppın (4). Aıta keteıik, 33 jastaǵy Jaqııanov elimizdiń atynan shyqqan Vasılıı Jırov, Beıbit Shúmenov jáne Gennadıı Golovkınnen keıin tórtinshi bolyp chempıon atanyp otyr.