Qazaqstanda bıznestegi áıelderdiń úlesi 50 paıyzǵa deıin ósti

Ortalyq kommýnıkasııalar qyzmetinde Elbasy Nursultan Nazarbaevtyń Joldaýyna arnalǵan baspasóz máslıhaty ótti. Oǵan «Qazaqstannyń isker áıelderi qaýymdastyǵy» RQU prezıdenti Raýshan Sársembaeva, «Luxury Antonovich Design» jobasynyń jetekshisi Elena Antonovıch pen «International Gold Group» JShS bas dırektory Sandýǵash Bekjigitova qatysty. Brıfıngte Raýshan Sarsenbaeva isker áıelder uıymy Memleket basshysynyń Qazaqstan halqyna Joldaýyn qoldaıtynyn, elimiz táýelsizdik alǵan kezden beri Nursultan Nazarbaev áıelderdiń jaǵdaıyn jaqsartý isine erekshe kóńil bólip kele jatqanyn, sonyń arqasynda Qazaqstanda áıelderdiń saıasatta, bızneste jáne qoǵamnyń barlyq salalarynda názik jandardyń áleýetin damytýǵa barlyq múmkindikter jasalǵanyn atap ótti. –Elimizde áıelder úshin barlyq jaǵdaıdyń jasalyp jatqanyn Parlament Májilisindegi depýtattardyń sanynan da kórýge bolady. Eger 2006 jyly áıelder az bolsa, qazir bizdiń úlesimiz 27,1 paıyzǵa jetti. Iаǵnı, elimizge mańyzdy sheshim qabyldaıtyn adamdardyń 30 paıyzy áıelder. Al barlyq deńgeıdegi máslıhattarda áıelder ókildiginiń deńgeıi saılanǵan depýtattardyń jalpy sanynyń 22,2 paıyzyna jetip otyr. Bul jaǵynan Qostanaı men Aqtóbe oblystary bárinen ozyp tur, – dedi ol. Sonymen birge ol áıelder qaýymy el ekonomıkasynyń damytýǵa da qomaqty úles qosyp kele jatqanyn aıtty. –Máselen, sońǵy 10 jylda jyldan jylǵa áıeldiń jumyssyzdyǵy 1,6 paıyzǵa tómendep, bıznestegi áıelderdiń úlesi 50 paıyzǵa deıin ósti. Áıelder Elbasynyń barlyq bastamalarynyń senimdi qoldaýshylaryna aınalyp, ókimettiń barlyq reformalaryna belsendi aralasyp, táýelsizdigimizdi nyǵaıtýǵa mańyzdy úles qosyp keledi, – dedi R.Sársembaeva. Jıynda Isker áıelder qaýymdastyǵynyń basshysy názik jandardyń áleýmettik-turmystyq jaǵdaıyna, otbasyndaǵy kıkiljińderge qatysty problemalarynyń bar ekenin de aıtyp, solardy sheshý úshin tıisti jumystyń jasalyp jatqanyn jetkizdi. Al jalpy aıtqanda Raýshan Sársembaeva Prezıdenttiń Qazaqstan halqyna Joldaýy áıel, erkek kindik demeı bárimizdiń bolashaǵymyz úshin jasalǵan qujat ekenin, ony halqymyz bir-birimizdi ultqa, jynysqa, din men tilge bólmeı birigip iske asyrý kerketigin aıtty. Brıfıngte kásipkerler Elena Antonovıch pen Sandýǵash Bekjigitova da Joldaýdy qoldaıtynyn, onda Elbasy elimizdi jan-jaqty damytýǵa barlyq alǵysharttardy jasap bergenin, eger solardy iske asyrsaq bolashaǵymyzdyń baıandy bolatynyn atap ótti. Dastan KENJALIN, «Egemen Qazaqstan»