Sırııa máselesi boıynsha kezdesý bir kúnge shegerildi

Astana prosesi aıasyndaǵy Sırııa daǵdarysyn retteýge arnalǵan kezekti otyrystyń ýaqyty bir kúnge shegerildi, dep habarlaıdy QR Syrtqy ister mınıstrliginiń baspasóz qyzmeti. «Astana prosessi aıasyndaǵy Sırııa daǵdarysyn retteýge arnalǵan joǵary deńgeıdegi kezekti kezdesý 2017 jyldyń 16 aqpany kúni 12:00-de bastalady. Kezdesýdiń ýaqyty tehnıkalyq sebepterge baılanysty shegerildi», - delingen resmı habarlamada. Aıta keteıik, kezdesý búgin, 15 aqpan kúni bastalýy tıis edi. QazAqparat málimeti boıynsha onda Sırııa jerinde áskerı is-qımyldy toqtatý rejimin saqtaý máseleleri, sonyń ishinde naqty terrıtorııalarda axýaldy turaqtandyrý jaıy sóz bolady degen jospar bar. Sondaı-aq, birlesken shuǵyl top týraly ereje qabyldanyp, bitimgerlik rejimdi kúsheıtý jáne Jeneva kelissózderi aldyndaǵy basqa da sharalar talqyǵa salynbaq. Sırııadaǵy atysty toqtatýǵa kepildik berip otyrǵan Reseı, Túrkııa men Iran memleketteriniń xabarlaýynsha, Astanadaǵy kezekti kezdesýge Iordanııa Koroldigi, Sırııa Arab Respýblıkasy, sol jerdegi qarýly oppozısııanyń ókilderi, BUU Bas xatshysynyń arnaıy ókili S. De Mıstýra, sondaı-aq AQSh baqylaýshy retinde shaqyrylyp otyr.