2016 jyly Qyzylorda oblysynda 133 aýyl sharýashylyǵy kooperatıvteri ashyldy

2017 jyly Qyzylorda oblysynda usaq taýar óndiristerin aýyl sharýashylyǵy kooperatıvterine biriktirip, ózin-ózi jumyspen qamtyǵandardy shaǵyn jáne orta bızneske jumyldyrý josparlanýda. Bul týraly Qyzylorda oblysynyń ákimi Qyrymbek Kósherbaev 15 aqpan kúni ótken halyqqa esep berý kezdesýinde málimdedi. -О́tken jyly oblysta qurylǵan 133 aýyl sharýashylyǵy kooperatıvteri óziniń qataryna 700-den astam shaǵyn taýar óndirýshi óndiristi biriktirdi. Ústimizdegi jyly taǵy 500 shaǵyn taýar óndirýshilerdi kooperatıvterge biriktirýdi josparlaýdamyz. Bul agrarshylardyń memlekettik sýbsıdııa alýǵa da, nesıelik resýrstar alýǵa da múmkindigin jeńildetedi,-  dep atap ótti aımaq basshysy. Sondaı-aq, jumyssyz jáne ózin-ózi jumyspen qamtyǵan aýyl turǵyndaryn jumysqa ornalastyrý máselesine erekshe kóńil bólinedi. О́tken jyly aımaqtyq «Qyzylorda» ınvestısııalyq ortalyǵy Kásipkerler palatasymen birlesip, «Mıkrobıznes-Qyzylorda» pılottyq jobasyn júzege asyra bastady. 2016 jyldyń ózinde 774 mln teńgege 124 joba júzege asyrylyp, 400-den astam jańa jumys oryndary quryldy. Bul jerde aıryqsha basymdyq jeke qosalqy sharýashylyqtardyń áleýetin paıdalaný jáne olardyń bazasynda et pen sút baǵytyndaǵy aýyl sharýashylyǵy kooperatıvterin damytý bolyp tabylady. -Taǵy bir erekshe atap óter jaıt, aımaqtyq ınvestısııalyq ortalyq qurylǵaly 2 jyl ishinde 1 mlrd teńgeden astam qarjyǵa aýyldyq jerlerdegi 184 joba qarjylandyryldy. Olardyń basym kópshiligi (70 paıyzy) - jumysyn alǵashqy bastaǵan kásipkerler. Nátıjesinde, aýyldyq jerde 650 jańa jumys oryndary quryldy,- dedi Q.Kósherbaev.