Janattyń kelesi qarsylasy kim bolýy múmkin?

Ortalyq kommýnıkasııalar qyzmetinde jaqynda ǵana bokstan álem chempıony ataǵyn jeńip alǵan Janat Jaqııanovpen kezdesý ótti. Ol 11 aqpanda AQSh-tyń Toledo qalasynda amerıkalyq Roýshı Ýorrenmen kezdesip, jeńil salmaqta WBA (Super) jáne IBO tujyrymy boıynsha chempıon ataǵyn jeńip alǵan edi. Osyǵan baılanysty boksshy baspasóz máslıhatyn ótkizip, AQSh-ta ótken jekpe-jek týraly áńgimelep berdi. Kezdesýde Jaqııanov Roýshı Ýorrenmen aıqastyń ońaı bolmaǵanyn, jekpe-jektiń barlyq raýndtarynda jattyqtyrýshysy Rıkkı Hattonnyń aqyl-keńesterin tyńdap, qarsylasyna eshqandaı múmkindikti bermeýge tyrysqanyn aıtty. «Meniń qarsylasym osal bolǵan joq. Ol kezinde WBA (Super) jáne IBO tujyrymy boıynsha álem chempıony ataǵyn ıelengen. Osy kezdesýde Ýorrenniń ataǵyn jeńip aldym. Birinshi raýndta Ýorrenniń soqqylarynyń joıqyn bolatynyn bilgenmin. Rıngke soǵan daıyndalyp shyqtym. Jekpe-jektiń basynda eki ret nokdaýn alyp qaldym. Biraq, kezdesýdi ózimniń qolyma alyp, sońyna deıin jetkizdim. El namysy synǵa túsip jatqanda jeńilý degendi bilmeımin, bilgim de kelmeıdi. Sodan bolar, jekpe-jekte arqam qyzyp, Ýorrendi qýalap júrip sabaǵym keldi. Ol besinshi burysh izdep ketkende bosańsymaı, ishimnen sharýany sol jerde sheshý kerek dep sheshtim. Sharshy alańda aıqyn basymdyqpen jeńgenimdi sezdim. Qazylar alqasy da maǵan basym daýyspen baǵa berdi», – dedi ol. Brıfıngte Jaqııanov osy aıqasqa WBA jáne IBO tujyrymy boıynsha birinshi orta salmaqtaǵy álem chempıony Rıkkı Hattonnyń jetekshiligimen daıyndalǵanyn, jattyǵýlardyń bári Ulybrıtanııada ótkenin aıtty. «Rıkkı Hatton tamasha jattyqtyrýshy. Men onyń komandasymen birneshe jyldan beri jumys istep kelemin. Ol 2007 jyly kásipqoı boksqa kelgenimde meni baıqap, ózine shaqyrdy. Sodan beri osy kezge deıin 28 jekpe-jek ótkizip, 27 ret jeńiske jettim. Bizdiń jattyǵýlar Ulybrıtanııada ótedi. Onda bári jaqsy uıymdastyrylǵan. Mysaly, sońǵy jekpe-jekke 10 apta daıyndaldym», – dedi Janat Jaqııanov. Sonymen birge, ol shetelden shaqyrtýlar kelip jatsa eshqaıda ketpeıtinin, kerisinshe, ózine qoldaý kórsetip, demeýshilik jasap jatqan Soltústik Qazaqstan oblysynyń ákimdigi men oblystyq sport basqarmasyna alǵysyn bildirdi. «Men eshqaıda ketpeımin. Ketkim de kelmeıdi. Ketpeımin de. Meniń Otanym – Qazaqstan. Qazaq eliniń namysyn qaı jerde bolsa da jyrtyp, aspan tústi týymyzdy bıikten jelbiretip júremin. Qazir Petropavl qalasynda oblystyq balalar jáne jasóspirimderge arnalǵan mektep-ınternatta jattyqtyrýshy bolyp qyzmet etemin. Bıyl bizdiń mekteptiń úsh tárbıelenýshisi sport sheberi atandy. Aldaǵy kezde de sport ordasynan talaı jas talantty boksshylardyń túlep shyǵatynyna senimdimin. Qazir oblysta boksqa barǵysy kelip júrgen balalar kóp. Munyń bári oblys ákimi men sport basqarmasynyń sport mektepterine kórsetip jatqan qoldaýynyń arqasy», – deıdi boksshy. Kezdesý sońynda Jaqııanov kelesi qarsylasy Djeıms Makdonaldstiń bolýy múmkin ekenin aıtty. Dastan KENJALIN, «Egemen Qazaqstan»